Tasqyn zardaptaryn joıý jaýapkershilikti talap etedi

Bıylǵy kóktemde Batys Qazaqstan oblysynda bolǵan sý tasqynynyń zardaptaryn tolyq qalpyna keltirý másele­le­rine arnalǵan úkimettik jedel keńes qalada júrip jatqan qurylys basynda ótkizildi. Oblysqa arnaıy kelgen Premer-Mı­nıstr Kárim Másimov  máseleni tótesinen qoıyp, búgingi is­tiń jaı-kúıi qandaı dep birinshi vıse-premer О́.Shókeevke saýal tastady. Keń de jaıly, jumsaq kabınette emes, qurylys proraby­nyń shaǵyn jumys ornynda ol Úki­met basshysyna tıisti habarlama jasady. О́ıtkeni, О́.Shókeev tús aýa ushyp kelip, tasqyn sý zardaptaryna kóbirek ushyraǵan Tasqala, Zelenov aýdandarynda jáne Oral qalasynda bolyp, Úki­met basshysynyń saýalynda aı­tylǵandaı, búgingi istiń jaı-kúıi­men tanysqan edi. Qazir oblysta tasqynnan kelgen shyǵynnyń mól­sheri túbegeıli anyqtaldy.  Aq­jaıyq aımaǵynda oryn alǵan úlken tabıǵat apatyna baı­la­nys­ty Úkimet tórt qaýly shyǵardy.  Sońǵy tórtinshi qaýlyǵa sáıkes úkimettik rezervten 6 mıllıard 680 mıllıon teńge bólindi. «Sa­mu­ryq-Qazyna» ulttyq ál-aýqat qorynan 5 mıllıard teńge aýda­ryldy. Jalpy somasy 17 mıllıard 372 mıllıon teńge qarajat tasqyn sý zardaptaryn joıýǵa, jańa qurylystar salýǵa jetedi dep eseptelip otyr. Iаǵnı, qansha su­ralsa, sondaı kólemdegi qara­jat Oral óńirine jóneltildi, – dedi Úkimet basshysynyń birinshi orynbasary. Budan ári ol ózi aralaǵan aý­maq­tardaǵy qurylystardyń jaı-kúıine toqtaldy. Onyń qysqasha mán-jaıy tómendegideı. Tasqala aýdanynyń ortalyǵy jańadan tur­ǵyzylatyn bes birdeı kóshe­men tolyqpaq. Al Zelenov aýda­nynyń ortalyǵy Pere­met­nyı kentinde barlyq jańa qu­ry­lys­tyń irgetasy ázir. Tas qa­laý ju­mys­tary bastalýda. Jańa shaǵyn aýdandarda sý qubyry júıe­lerin tartý jumystary aıaqtalǵan. So­ny­men birge jol salý, jylý júı­e­lerin júrgizý jáne jaryq­tan­dy­rý jumystary qatar atqary­lý­da. Qazir Oral qala­sy­nyń 5-shi sha­ǵyn aýdanynda da qu­rylys ju­mys­tary qyzý qar­qyn­men bastal­dy. Mundaǵy sal­y­na­tyn jańa ny­san­dar sany jeteý. Qazirgi jumys yrǵaǵy belgilengen kestege saı. Merdiger uıymdar qurylysty 1 qyrkúıekke deıin aıaqtaýdy kózdep otyr. Buǵan deıingi derekterde oblysta tasqyn sýdan búlingen turǵyn úıler men saıajaılar, áleýmettik nysandar, mektepter men balabaqshalar sany aıtylǵan bolatyn. Ári ony biz buǵan deıingi materıaldarymyzda birneshe dúrkin kórsetip jazǵan edik. Alaıda Premer-Mınıstr Kárim Másimov bul derekterge onsha qanaǵattanbaı, tasqynnan naqty qansha adam zardap shekkenin anyq­­taǵan jón bolatynyn jetkizdi. Bul máselege túsinik bergen Batys Qazaqstan oblysynyń ákimi B.Izmuhambetov ne turaqty meken-jaıy, ne tirkelgen belgili bir turaǵy joq adamdardyń  qazirgi kezde kóbeıip otyrǵanyn aıtty. Osy máselege baılanysty zańdyq-quqyqtyq turǵydan tekserý jumystary qolǵa alyndy, – dedi Baqtyqoja Salahatdınuly. Budan ári Premer-Mınıstr kókeıindegi kezekti saýalyn Oral qalasynyń ákimi S.Orazovqa ba­ǵyttap, oblys ortalyǵyndaǵy eva­­kýasııalyq qosyndardyń bú­gin­gi tynys-tirshiligin bilgisi keletinin jetkizdi. – Búgingi kúni qaladaǵy tórt evakýasııalyq qosynda myńnan astam adam ýaqytsha turyp ja­tyr. Olarǵa qajetti barlyq tur­mystyq jaǵdaılar týǵyzylǵan. Árqaısysyna bólek papka ashyl­ǵan,  dedi Úkimet basshysynyń saýalyna oraı qala meri. Evakýasııalyq qosyndaǵy ýa­qyt­sha turǵyndardyń jáı-kúıi týraly áńgime  qozǵalǵanda Kárim Qajymqanuly olardy túgeldeı derlik eńbekke ornalastyrýǵa yq­pal jasaý qajettiligin jergilikti atqarýshy organdar bas­shylaryna shegeleı tapsyrdy. Sodan soń Premer-Mınıstr K.Másimov Tótenshe jaǵdaılar mınıstri V.Bojkoǵa bıyl Oral óńirinde bolǵan tasqyn sýdan qandaı taǵylym men sabaq aldyńdar degen saýal qoıdy. Bul saýalǵa mınıstr bıylǵy kóktemde munda egemendikpen bir­ge tusaýy kesilgen mı­nıstr­liktiń qutqarý qyzmeti tuńǵysh ret jaýapty synnan ótti. Árıne bári keremet deı almaımyz. Jetpeı, olqy túsken tustarymyz da bar ekenin bildik. Sondaı-aq tótenshe jaǵdaı bir ǵana shema boıynsha  is-qımyl tanytýdan bas tartý qajettiligin aıqyn kór­setip berdi. Munyń bári biz úshin úlken sabaq bolmaq. Nen­deı istiń de mınýsy men plıý­sy bolýy zańdylyq. Osy tur­ǵyda biz bú­ginde taldaý-sarap­tamalyq ju­mys­taryn júrgizý­demiz dep jaýap qaıtardy. О́z kezeginde jergilikti merdigerler Aleksandr Potıchenko men Valentına Mıhno qurylysqa irkilis týǵyzatyndaı faktorlar joq ekenin aıtty. Olardyń oı­laryn tolyqtyrǵan Úkimet bas­shysy Oral óńirindegi aýqymdy da alyp qurylys jumystaryna tek jergilikti merdigerler tarty­lyp otyrǵanyn aıtty. Osy ar­qyly qosymsha jumys oryndary paıda bolǵany týraly málimdedi. Bul jerdegi barlyq jaýapkershilik oblys basshysyna júk­teletinin jetkizdi. Oral qalasyndaǵy qurylys basynda ótken jedel keńesti qo­ry­tyndylaǵan Premer-Mınıstr Kárim Másimov tasqynnyń alǵashqy kúninen Elbasy Nur­sultan Nazarbaev oblystaǵy jaǵ­daıdy tikeleı ózi baqylaýǵa alyp, batysqazaqstandyqtarǵa qa­jetti barlyq kómekti kórset­keni týraly aıtyp berdi. Sáti tús­ken ýaqytta Memleket bas­shysy Batys Qazaqstan oblysyna kelip, qalpyna keltirý jumys­tarynyń nátıjelerimen tanysa­tyn bolady,  dedi ol.  Sondaı-aq  K.Má­simov tasqyn sý zardap­taryn qalpyna keltirý isiniń jaı-kúıimen tanysý úshin Aqjaıyqqa arnaıy kelgen saparynda bul máselege qatysty qandaı da bir bolmasyn qoıatyn kinási men aıta qalarlyqtaı eskertýi joq ekenin málimdedi. Temir QUSAIYN, Oral.