Ekologııalyq tólemder tıimsiz paıdalanylýda

Keshe Senat Tóraǵasynyń orynbasary M.Kópeevtiń qatysýymen «Qorshaǵan ortaǵa emıssııadan túsetin qarajatty óńirlik deńgeıde tıimdi paıdalaný máseleleri jónindegi zańnamany jetildirý» taqyrybynda dóńgelek ústel bolyp ótti. Onyń jumysyna palata depýtattarynan ózge qorshaǵan ortany qorǵaý, ekonomıkalyq damý jáne saýda, qarjy mınıstrlikteri men salyq komıtetiniń, Bas prokýratýranyń, jergilikti bılik pen úkimettik emes uıymdardyń ókilderi qatysty. Agrarlyq máseleler jáne qor­shaǵan ortany qorǵaý komıtetiniń tór­aǵa­sy B.Jylqyshıev talqylaýdy asha kelip,  qa­ra­jatty tabıǵatty paıdalanýshylardyń paı­da­lanýy, sondaı-aq qorshaǵan orta úshin aly­natyn emıssııa tólemderi jónindegi zańna­ma­ny jetildirý mańyzdy ekenin atap ótti.  Sha­raǵa qatysýshylar aldynda sóz alǵan palata tóraǵasynyń orynbasary Muhambet Kópeev Astanada ótken IV ekonomıkalyq forýmda Prezıdent N.Nazarbaevtyń qorshaǵan ortany qorǵaýǵa jáne ótkir ekologııalyq máselelerdi sheshýge erekshe nazar aýdarǵanyn, sondyqtan da ındýstrııalyq saıasatty júzege asyrýda «jasyl ekonomıkany» jáne salyq salýdyń «ekologııalyq» júıe quraldaryn engizý» erekshe mańyzǵa ıe ekenin  erekshe atap ótti. Osy saladaǵy zańnamany jetildirýge Senat zor kóńil bólip kele jatqanyn atap óte kelip, M.Kópeev aýany lastaǵany úshin alynatyn qazirgi tólem júıesi, qorshaǵan ortaǵa arnalǵan emıssııa tólemderin jınaý ekologııalyq ótkir máselelerdi sheshýde tıimsiz ekenine toqtaldy. Qazirgi kezde negizinen kiris túsirýge ǵana basa kóńil bólinip otyr, al lastanýdy azaıtýǵa yqpal etetin quraldar tolyq kólemde paıdalanylmaı keledi. Mun­daı áreket aýany lastaǵany úshin tólenetin tólemder negizinen salyqtyq sıpatqa ıe bo­lý­ǵa ákep soǵady, al ekologııalyq zııandy ónim úshin tólengen tólemder tıimsiz paı­dalanylýda. Qorshaǵan ortaǵa arnalǵan emıs­sııalyq tólemder Bıýdjet kodeksine sáıkes, oblystardyń, sondaı-aq Almaty jáne Astana qalalarynyń bıýdjetterine túsedi. Biraq, M.Kópeevtiń aıtýynsha, qorshaǵan ortany qorǵaý sharalaryn qarjylandyrý qujatta jeke jolda jazylmaǵan jáne ekologııalyq tólemderden túsetin kólemmen baılanys­paǵan. Talqylaý barysynda qorshaǵan ortany qorǵaý mınıstriniń orynbasary R.Bóltirikov, salyq komıteti tóraǵasynyń orynbasary A.Qypshaqov, Ekonomıkalyq damý jáne saýda mınıstrliginiń jaýapty hatshysy D.Sháje­nova, Aqtóbe jáne Pavlodar oblystary ákim­deriniń orynbasarlary R. Kemalova men M.Kó­benov, «Astana kommersııalyq emes uı­ymdarynyń forýmy» zańdy tulǵalar bir­les­tiginiń prezıdenti B.Ahmetjanova jáne bas­qalar sóz sóılep, depýtattardyń saýaldaryna jaýap berdi. Asqar TURAPBAIULY.