Burynǵy «VDNH» jańarady

Reseı baspasóziniń aqparatyna qaraǵanda, Máskeýdegi buryn «Halyq sharýashylyǵy jetistikteri kórmesi», dep al aýyzeki tilde «VDNH» atalyp, keıingi kezeńde Búkilreseılik kórme ortalyǵy (BRKO) bolyp ózgergen burynǵy KSRO halyqtaryna jaqsy tanys keshen taıaý ýaqytta jańasha qurylatyn bolady. Bul úshin osy ýaqytqa deıin Máskeý úkimeti men federaldyq úkimet ekeýlep ıelik etip kelgen, BRKO ornalasqan jer ýchaskelerin tutastaı Reseıdiń múlik komıtetine qaıtarý jumystary júrgizilýde. Búkilreseılik kórme ortalyǵynyń jańa tujy­rymdasyna sáıkes ony tolyq qaıta qurý 2034 jyly aıaqtalýǵa tıis. Tujyrymdamada burynǵy keńestik respýblıkalardyń pavılondaryn qaıta qalpyna keltirý, akvapark salý, qonaq úı keshenin, ǵylymı-tehnıkalyq murajaı turǵyzý máseleleri de kózdelgen. Aqparat kózderiniń dereginshe, qazir osynda Belarýs Respýblıkasynyń jáne Qyrǵyz Respýblıkasynyń saýda-kórme ortalyqtaryn qurý týraly Belarýs Respýblıkasy men Qyrǵyz Respýblıkasy úkimetteriniń Reseı úkimetimen ózara kelisimi kúshine endi. Al «Armenııa» pavıl­ony kommersııalyq kelisim negizinde biraz ýaqyttan beri jumys istep keledi. Qazaqstan Úkimeti de bul tarapta syrt qalyp otyrǵan joq. Qazir kópshilikke burynnan belgili «Qazaqstan» pavılonyn qalpyna keltirýdiń naqty sharalary qolǵa alynýda. О́ıtkeni úkimetaralyq kelisimge sáıkes tıesili pavılondy ár respýblıka óziniń qarajatymen qalpyna keltirip, qaıta jańǵyrtýǵa tıis. Máskeýdegi «Qazaqstan» pavılonyn qalpyna keltirý syndy mańyzdy da kólemdi jumys aýqymy «Qazmunaıgaz» ulttyq kompanııasyna júktelýi múmkin. Sonymen birge buǵan basqa da ınves­torlardyń qatysý múmkindigi joqqa shyǵaryl­maıtyn sııaqty. Jalpy BRKO birneshe baǵytta damytylady dep jobalanýda. Sonyń biri, joǵaryda aıt­qanymyzdaı, TMD elderiniń tarıhı pavılon­daryn qalpyna keltirý. Osy pavılondar ornala­satyn Ortalyq alleıa budan bylaı Ulttar alleıasy dep atalmaqshy. Sondaı-aq bolashaqta bul pavılondarda osy elder úkimetteriniń ókildikteri ashy­lyp, ár eldiń ǵylym men ónerkásip sala­laryndaǵy jetistikteri keńinen kórsetiledi, ulttyq taýarlar satylatyn bolady. Búkilreseılik kórme ortalyǵyna osyndaı jańa mártebe berý baǵyty 2004 jyly da bir márte qolǵa alynyp, aıaqsyz qaldyrylǵan eken. Al reseılikterdiń burynǵy «VDNH»-ny jańasha jańǵyrtý jolyndaǵy qazirgi qadamyna Keden oda­ǵynyń qurylýy, Birtutas ekonomıkalyq keńistiktiń bolashaǵy jańa tynys berip otyr deýge bolady. Serikqalı BAIMENShE, «Egemen Qazaqstan» – Máskeýden.