Raqymshylyq jasaý týraly zań jetinshi márte qabyldanǵaly tur

Táýelsiz Qazaqstan jetinshi ret raqymshylyq jasaý týraly zań qabyldaǵaly tur. Bul jóninde Májiliste ótken jumys tobynyń otyrysynda aıtyldy. Májilistiń Zańnama jáne sot-quqyqtyq reforma komıtetiniń uıymdastyrýymen «Qazaqstan Respýblıkasy Táýelsizdiginiń 20 jyldyǵyna baılanysty raqymshylyq jasaý týraly» zań jobasynyń tanystyrylymy ótti. Otyrysty zań jobasy bo­ı­yn­sha qurylǵan jumys tobynyń jetekshisi, Májilistiń Zańnama jáne sot-quqyqtyq reforma ko­mı­tetiniń múshesi Serik Temirbolatov júrgizdi. Zań jobasynyń maqsaty jóninde Ádilet mı­nıstriniń orynbasary Ámirhan Amanbaev baıandama jasady. Bul zań jobasy Qaýipsizdik Keńesiniń 2011 jylǵy 15 naýryzdaǵy hat­ta­malyq sheshimin oryndaý maq­sa­tynda ázirlengen. Ataýly oqı­ǵalarǵa baılanysty raqym­shy­lyq jasaý álemniń kóptegen elderinde qoldanylady. Baıandamashy atalǵan zań jo­ba­synda raqymshylyq jasaý, tu­tastaı alǵanda, áleýmettik tur­ǵy­dan az qamtylǵan sanattaǵy aza­mattarǵa, aýyrlyǵy ortasha, onsha aýyr emes qylmys jasap sottalǵan adamdarǵa, onyń ishinde kámeletke tolmaǵandarǵa, júk­ti áıelderge jáne kámeletke tol­maǵan balalary bar áıelderge, I, II jáne III toptaǵy múgedekterge qatysty júrgizý usynylyp otyr­ǵanyn jetkizdi. Bul zań aktisi qabyldanǵannan keıin alty aı merzimge qoldanylatynyn aıtty. Sondaı-aq osy zań qoldanysqa en­gizilgenge deıin onsha aýyr emes jáne aýyrlyǵy ortasha qylmys jasaǵany úshin qylmystyq jaýapkershilikke tartylatyn barlyq qylmystyq isterdi jáne qyl­mystar týraly sotta qaralmaǵan isterdi toqtatý kózdeledi. Serik Temirbolatov Qazaqstan egemendigin jarııalaǵannan beri túrli merekelik datalarǵa oraı raqym­shy­lyq jasaý týraly 6 ret zań qa­byldanǵanyn málim etti. Atap aıtqanda, 1994 jyly 5 qa­zanda, 1996 jyly 15 maýsymda, 1999 jyly 13 shildede, 2000 jy­ly 29 jeltoqsanda, 2002 jyly 19 aq­panda jáne 2006 jyly 9 qań­tarda raqymshylyq jasaý týraly zańdar qabyldandy. Zań jobasy qabyldanǵan jaǵ­daıda ony iske asyrý qosymsha qarajatty talap etpeıdi, sebebi, qarjylyq shyǵyndar bólingen qa­rajat sheginde júzege asyrylady. Aıbatyr SEITAQ, jýrnalıst.