Keshe Qazaqstan áýe tolqynynda «Klassık» radıosy tusaýyn kesti

Áldıle, ásem mýzyka! Iá, kesheden beri el tarıhynda jáne kúlli Ortalyq Azııa aımaǵynda tuńǵysh ret «Klassık» jańa radıostansasy iske qosyldy. Bekzat mýzykaǵa negizdelgen jańa radıo – Qurmanǵazy atyndaǵy Qazaq ulttyq konservatorııasy men «Habar» agenttiginiń birlesken medıa-jobasy bolyp tabylady. Osy aıtýly oqıǵaǵa baıla­nys­ty senbi kúni  Qurmanǵazy atyndaǵy  ulttyq konservato­rııa­da baspasóz máslıhaty ótip, jańa radıo tolqynnyń jaı-japsary aıtylyp, tusaýkeser rásimi ótken-di. Mundaı radıostansany dú­nıege ákelýdegi maqsat – akade­mııalyq  mýzykalyq mádenıetti otandyq tyńdarmandar úshin qol­jetimdi etý. – Ádette, shet elderge bar­ǵanda klassıkalyq radıony jıi tyń­daıtyn edim. Sol kezde osyndaı kásibı radıo bizdiń elde de bolsa ǵoı dep ylǵı da armandap júretinmin. Aqyry «Habar» agenttiginiń muryndyq bolýy­men joba iske asty, – deıdi osy ıdeıanyń avtory Jánııa Áý­bákirova. Qazirge atalmysh radıo Al­maty qalasyndaǵy 102,8 FM jıi­­liginde habar taratady. Efırdi josparlaý, baǵdarlamalardy jasaý isimen kásibı mýzyka ıeleri aınalysatyn bolady. Osylaısha  «Classic» radıosy­nyń habar taratý júıesi ár ke­zeń­degi, túrli stıldegi, san alýan baǵyttaǵy klassıkalyq mýzy­ka­larǵa negizdelgen. Sondaı-aq, efır­de Qazaqstan men álem mádenıeti­niń tynys-tirshiligin únemi baqy­lap otyrar tól baǵdarlamalarǵa da oryn berilgen. Mýzykalyq arnada ataqty kompozıtorlar, oryn­daýshylar men álem óneriniń altyn qoryna engen týyndylar jaıly radıohabarlar da taratyl­maq. Oǵan qosa Qurmanǵazy atyn­daǵy Qazaq ulttyq konserva­to­rııasynyń  Organdy zalynda óte­tin konsertterden tikeleı trans­lıasııalar uıymdastyrý da josparlanýda. Bastapqy kezeńde bul radıo­ny Almaty qalasynda ǵana tyń­daýǵa múmkindik bar ekenin joǵa­ryda ataǵanbyz. Degenmen, ýaqyt óte kele «Classic» radıosyn Qa­zaq­stannyń barlyq óńiriniń  mý­zykasúıer qaýymy tyńdaıtyn bo­lady. Sondaı-aq habar taratyla bastaǵan alǵashqy kúnnen bastap klassıkalyq mýzykany ulyqtaı­tyn radıotolqyn sandyq formatta usynylatyn bolady. Kúni­ne birneshe ret efırge qazaq­stan­dyq jáne álemdik mýzyka máde­nıeti týraly jan-jaqty maǵlu­mat­tar men aqparattyq baǵdarla­malar shyǵarý jos­par­lanyp otyr­ǵan bolsa, qyr­kúıekten bastap túrli avtorlyq radıo­baǵ­darlamalar, suhbattar, ataqty mý­zykanttardyń ómirinen syr shertetin habarlar, jańa­lyqtar berilmek. – Bizdiń maqsatymyz – klas­sı­kalyq mýzyka mádenıetin barsha qazaqstandyq tyńdaýshylarǵa jet­kizip, álemniń ásemdigine la­ıyqty úles qosý. Mádenıet – qoǵamy­myzdyń ajyramas bólshegi. Rýhanı qundylyqtardy qalyptas­ty­ratyn mádenıet. Klassıkalyq radıonyń kirpishin qalaı otyryp, biz sol rýhanı qundylyqtyń qo­ǵam­da irgesi qalanýyna, zaıyrly, órkenıetti, demokratııalyq ba­ǵyt­taǵy el atanýymyzǵa úles qo­samyz dep senimmen aıta alamyz, – deıdi «Habar» agenttigi» AQ tór­aǵasynyń orynbasary Qanat Saharııanov. «Habar» agenttiginiń kreatıvti dırektory Erjan Sú­leı­menov­tiń aıtýynsha, klassıka­lyq mý­zy­ka radıotolqynyn qu­rý tal­ǵamy joǵary tyńdar­man­dar le­gi­niń kóńilinen shyǵý bolyp tabylady. Qazirgi tańda «Klassıcheskoe ýtro», «Dyhanıe garmonıı», «Afı­­sha», «Konsertnyı zal» atty ta­qyryptyq baǵdarlamalardy Er­keǵalı Rahmadıev, Tólegen Mu­hamedjanov, Aqtoty Raıym­qulova, Bákir Baıahýnov, Vladımır Gross, Bahtııar Amanjol syndy belgili qazaqstandyq mý­zykanttar ázirleý ústinde. Al Torontodan eksklıýzıvti habarlardy «Classic» radıosy úshin tanymal mýzykatanýshy Evgenıı Bychkov ázirlep turatyn bolsa, djazǵa arnalǵan arnaıy baǵdarlamalardy mýzykanttar –Vladımır Osıpov, Mıhaıl Balabıchev, Farhad Ibragımov, Iren Aravınalar daıyndaıtyn bolyp otyr. Radıonyń formaty aýdıtorııamen tikeleı áńgime-dúken qu­rý múmkindigin de qaras­tyrady. «Mýzyka salony» baǵdarlama­synda tyńdarmandar ózderiniń mýzyka álemi men oryndaý­shy­larǵa qatysty kózqarastaryn bildirip, súıikti shyǵarmalaryn áýe tolqynyna shyǵarýdy suraı­tyn bolady. Aınash ESALI, Almaty. Sýretterdi túsirgen Bersinbek SÁRSENOV.