Yntymaqtastyq bastamalary

Qazaqstan Prezıdenti janyndaǵy Strategııalyq zertteýler ınstıtýty Koreıa Respýblıkasynyń elimizdegi elshiligimen birlesip, «Qazaqstan-Koreıa saraptamalyq semınary» sharasyn ótkizdi. Onda eki el yntymaqtastyǵynyń barysy, ózara qarym-qatynastardy damytýdyń perspektıvalary talqy­landy. Qazaqstan men Koreıa arasyndaǵy qarym-qatynastardy tereń zerdelep júrgen sarap­shy­lardyń basqosýy ıgi dástúrge aınalyp otyr. Memleket jáne úkimet basshylary deńgeıinde, sondaı-aq, túrli sala boıynsha da eki el arasynda únqatysý ornaǵan. Qa­zaq­stan Prezıdenti Nursultan Nazarbaev tórt ret Ońtústik Koreıada bolǵan. Tıisinshe Koreıa basshysynyń da Qazaq­standa bes ret bolǵany ataldy. Koreıa prezıdenti elimizge sońǵy saparynda Eýrazııa elderin biriktirer «eýrazııashylyq» bastamasyn kótergen-di. Bul Qytaıdyń «Nazarbaev Ýnıversıtet» qabyrǵasynda jarııa etilgen «Jibek joly ekonomıkalyq beldeýimen» ushtasyp jatyr, dep atap ketti QSZI dırektorynyń orynbasary Sanat Kóshkimbaev. Onyń aıtýynsha, Qazaqstan bul usynysqa úlken qyzyǵýshylyq tanytady jáne kóliktik, energetıkalyq baǵdarlamalar men jobalarǵa qatysýǵa daıyndyǵyn jasyrmaıdy. Bul rette, Ońtústik Koreıanyń Qazaqstan bastamasymen qurylǵan ASShО́K-niń (Azııadaǵy ózara is-qımyl jáne senim sharalary jónindegi keńes) belsendi múshesi ekendigin aıta ketý kerek. Sonymen qatar, Ońtústik Koreıa – Qazaq­stannyń BUU QK-niń 2017-2018 jyldarǵy turaqty emes músheligine kandıdatýrasyn qoldaǵan elderdiń biri. Budan basqa, bul el kezinde Astanada EKSPO-2017 halyqaralyq kórmesin ótkizýge de qoldaý bildirgen edi. Jalpy, Ońtústik Koreıanyń Qazaqstanǵa 9 mıl­lıard dollardaı ınvestısııa quıyp, negizgi ınvestorlar qatarynan tabylyp otyrǵanyn da atap kórsetken jón. Sondaı-aq, shara aıasynda Ortalyq Azııada ıadrolyq qarýdan azat aımaq qurý perspektıvalary jáne de Eýrazııalyq ekonomıkalyq odaq pen Ońtústik Koreıa yntymaqtastyǵynyń máseleleri talqyǵa salyndy. Elimizdegi Koreıa elshisi Cho Iongchon óz sózinde Sarapshylyq ke­ńes eki el arasyndaǵy baılanystyrýshy kópirge aınalyp otyrǵandyǵyn atap ótti. Onyń aıtýynsha, eki el arasyndaǵy yntymaqtastyq joǵary deńgeıde jáne onyń áleýetin arttyrýǵa barlyq múmkindikter bar. Qazaqstan tabıǵı resýrstarǵa baı el bolsa, Ońtústik Koreıada zamanaýı tehnologııalardy damytý jolǵa qoıylǵan. Al Qazaqstan Prezıdenti janyndaǵy strategııalyq zertteýler ınstıtýtynyń eko­nomıkalyq zertteýler bóliminiń meń­gerýshisi Evgenıı Hon Ońtústik Koreıa úshin Ortalyq Azııa elderi men Eýrazııalyq ekonomıkalyq odaq elderi mańyzdy sanalatynyn ortaǵa saldy. Seýl tarapynan bastamashylyq tanytylǵan Ońtústik Koreıa jáne Ortalyq Azııa forýmy, sondaı-aq, jańa ózara tıimdi yntymaqtastyqqa qurylǵan resýrstardy tehnologııalarǵa aıyrbastaý sekildi Azııa bastamasynyń orny erekshe ekendigi de alǵa tartyldy. Asqar TURAPBAIULY, «Egemen Qazaqstan».