Qytaı úkimeti shilde aıynyń aıaǵyna deıin barlyq sheteldik azamattardyń Tıbetke barýyna tyıym salyp otyr. Bul Qytaı Kompartııasynyń 90 jyldyǵy men Tıbetti baǵyndyrýdyń 60 jyldyǵyna oraı jasalyp otyrǵan qaýipsizdikti saqtaý sharasy bolyp tabylady.
Qytaı bıligi tıbettik separatısterdiń atalǵan mereıtoılarǵa qarsy uıymdastyratyn qarsylyq aksııalarynan qaýiptenetin kórinedi. Degenmen, bular týraly Qytaı bıligi áli kúnge resmı málimdeme jasaǵan joq, biraq eldegi barlyq týrıstik agenttikter ózderiniń osyndaı buıryq alǵanyn jasyrmaýda.
Jaýyzdyǵyna saı – jazasy
Sankt-Peterbýrgtiń qalalyq soty birneshe adamdy násildik kemsitýshilik saldarynan aıaýsyzdyqpen óltirip, jaýyzdyq áreketter jasaǵan skınhedter bandasy basshylarynyń biri – Alekseı Voevodındi ómir boıy bas bostandyǵynan aıyrý týraly úkim shyǵardy.
Alqa bıler soty sotqa tartylǵan barlyq 12 qanisherdi de qylmysker dep tanyǵan edi. Qalǵan qylmyskerler ártúrli merzimge bas bostandyǵynan aıryldy. Al bandanyń taǵy bir basshysy D.Borovıkov qashýǵa áreket jasaǵanda atyp óltirilgen bolatyn. Bandanyń dáleldengen qylmystary arasynda koreılik Kım Henniń, afrıkalyq Sambo Lampasaranyń jáne t.b. onshaqty adamnyń ólimi bar.
Reseılikterden ózgeleri aman-saý
Budan buryn Túrkııanyń «Bodrým» kýrortynyń jaǵasynda kememen saıahattap júrgen bir top reseılik týrısterdiń araqtan ýlanǵanyn aıtqan bolatynbyz. Qazir aýrýhanaǵa jetkizilgen 20 adamnyń ishinen 30-ǵa jetpegen 3-ýi kóz jumǵan, qalǵandarynyń jaǵdaıy da máz emes.
Bir qyzyǵy – ıahtada orystardan basqa ulybrıtanııalyq, polshalyq, sondaı-aq ózge TMD elderinen azamattar bolǵan. Biraq tegin araqtan ýlanǵandar tek reseılikter bolyp shyqqan. Alǵashqy tekseris nátıjelerine qaraǵanda, araq quramynda metanol bolǵandyǵy anyqtalyp otyr. Túrik jaǵy ıahtaǵa araqty orys týrısteriniń ózderi ákelýi múmkin degen boljam aıtýda. Qazir bul ispen eki eldiń de quqyq qorǵaý qyzmetteri aınalysyp jatyr.
Qanisherdiń ózi de lań, arty da lań
Máskeý bıligi cheshen soǵysynda aýyr qylmys jasap, 18 jasar qyzdy zorlap ári óltirgendigimen aty shyqqan burynǵy polkovnık Iý.Býdanov ajal qushtyrylǵannan keıin orys ultshyldarynyń zańsyz aksııa jasaýynan qaımyǵyp, qazir Manej alańynda tártip saqtaý sharalaryn kúsheıtýde.
Býdanovty merziminen buryn bosatý Cheshen Respýblıkasynda úlken qarsylyq aksııasyn týǵyzǵan edi. Aqyry, ótken juma kúni belgisiz bireýler qanisherdi óz úıiniń mańynda atyp ketti. Endi sonyń saldarynan qoryqqan quqyq qorǵaý organdary qatty ábigerde. Manej alańyna túıisetin metro stansalarymen kelgen barlyq adamdardan qarý-jaraq izdelýde. Al senbi kúni Manej alańyndaǵy tártipti baqylaýǵa 2 myńnan artyq quqyq qorǵaý qyzmetkerleri tartylǵan kórinedi.
Aýǵanstannan ázir ketkisi joq
Ulybrıtanııanyń kún saıyn shyǵatyn Guardian gazetiniń málimdeýine qaraǵanda, AQSh ákimshiligi sońǵy bir jarym aı boıy Aýǵanstan basshylyǵymen áskerı áriptestik merzimin uzartý jóninde kelissózder júrgizýde eken. Aldyn ala jasalǵan kelisimderge sáıkes AQSh óz áskerin Aýǵanstannan 2014 jyly áketýge tıis bolatyn.
Biraq Vashıngton Aýǵanstandaǵy jaǵdaı 2014 jyldan keıin de turaqty bola qoımaıdy degen syltaýdy kóldeneń tartyp, áskerdiń uzaq merzimge qala turýyn qalap otyr. Al aımaqtaǵy Qytaı, Reseı jáne Úndistan sekildi elder AQSh-tyń bul qalaýyna alańdaýshylyq bildirip, onyń áskeriniń belgilengen merzimde ketkenin jón kóredi.
Inflıasııa Qytaıdy da qysyp tur
Qytaıdy da ınflıasııa alqymnan alyp tur. Memlekettik statıstıka basqarmasynyń derekterine qaraǵanda, tutyný baǵasy mamyr aıynda 2010 jyldyń sáıkes merzimimen salystyrǵanda 5,5 paıyzǵa ósken. Al maýsym aıyndaǵy boljam boıynsha ol 6 paıyzǵa deıin kóterilýi múmkin.
Bul – Qytaı úshin úlken san. Al azyq-túlik baǵasynyń ósimi 11,7 paıyzǵa jetken. Osynyń bári halyqtyń ál-aýqatynyń nasharlaýyna soqtyratyny belgili, biraq Qytaı bıligi qolda bar múmkinshilikterdi paıdalanyp, ósimniń toqtaýyn qamtamasyz etetin sharalar jasaıtynyn málimdedi. Jalpy, Beıjiń bıyl ınflıasııa kólemin 4 paıyz sheńberinde ustaıtyndyǵyn jarııalaǵan edi.
Qysqa qaıyryp aıtqanda:
• Reseıdiń Joǵarǵy soty V.Jırınovskııdiń ústinen azamattyq ar-ojdanyn qorǵaý jóninde júgingen Máskeýdiń burynǵy meri Iý.Lýjkovtyń shaǵymyn aıaqsyz qaldyrdy. Al aýdandyq sot qashanda artyq-aýys sóıleıtin Jırınovskııdi adamdy jazyqsyz kinálaǵany úshin 500 myń rýbl aıyp tóleýge buıyrǵan edi.
• Tokıo turǵyndary eldegi ıadrolyq energııa óndirýmen aınalysatyn kompanııalarǵa qarsy aksııalar ótkizip jatyr. «Fýkýsıma-1» zardabynan keıin olar barlyq AES-terdi jabýdy talap etýde. Osy arada eldegi ótkizilgen referendýmda ıtalııalyqtar da atom elektr stansalarynan bas tartý týraly ortaq sheshimge keldi. Bul premer-mınıstr S.Berlýskonıge taǵy bir soqqy bolyp tıdi.
• Reseı Federasııasynyń prezıdenti D.Medvedev О́zbekstan prezıdenti I.Karımovpen Tashkentte bolǵan kelissózderge rıza bolǵandyǵy sondaı, tórt saǵatqa sozylǵan kezdesýden keıin de eki eldiń basshylary bir-birinen aırylmaı, áýejaıǵa bir máshınemen keldi, dep jazady reseılik basylymdar. Eki prezıdent osy jerden Astanada bolatyn ShYU sammıtine qatysýǵa ushyp shyqqan.
• AQSh-ta 1945-67 jyldary eldiń Vetnamǵa qarsy saıasatynyń qupııa qujattary 47 tom bolyp jaryqqa shyqty. Sarapshylardyń aıtýyna qaraǵanda AQSh-tyń Vetnam isterine aralasýdaǵy maqsaty ashyq aıtylǵan saıasattan áldeqaıda kúrdeli bolǵan kórinedi.
• Belorýssııadaǵy tómengi baǵany paıdalanǵan «iskerler» barlyq taýarlardy syrtqa tasyp, ishki rynokty jalańashtaýda kórinedi. Soǵan qarsy bılik tońazytqyshtar, gazplıtalar, túrli jarmalar jáne t.b. ónimderdi syrtqa shyǵarýǵa tyıym salǵan.
Internet materıaldary negizinde ázirlendi.
