«Jekege» jeńildik joq
«Turǵyn úıge topalań tıgeli qashan?! Aldymen altynshy kireberiske alańdadyq, úıdiń búıirinen dúken men dárihana ıesi qosymsha qurylys júrgizgeli úreı seıildi. Qazir birinshi kireberis qınap tur. Qabyrǵa qıylysqan tus jarylǵanda, ákimdikke aryzdandyq. Biraq, bergen ýáde bolmasa, qaıyr shamaly. О́zimiz qaltadan qarajat shyǵaryp, ýaqytsha qaýipsizdikti qamtamasyz ettik».
Bul − Alashahan dańǵylyndaǵy №33 úıde turatyndardyń aıtqany.
«Baspana 1966 jyly paıdalanýǵa berilgen. 2000 jyldan beri bizdiń balansta. Kezinde jan-jaqty tekserilip, jarylǵan jeri bitelgen. 2012-2014 jyldary eshqandaı oǵash ózgeris baıqalmady. 2015 jyly tamyzda taǵy syzat tústi. Byltyr úsh ret jalpy jınalysyn ótkizdik. Birinshi kireberistegi apattan arylýdyń jaı-japsary talqylandy. Odan ári búlinýdi toqtatý úshin paneldi nyǵaıtýǵa baǵyttalǵan jóndeý júrgizildi», dedi «Bosaǵa» jekemenshik páter ıeleri kooperatıviniń basshysy Sársenkúl Igemberlına.
Árıne, jaısyz jaǵdaıdan jergilikti bılik jan-jaqty habardar.
«Men turǵyndarmen birneshe ret kezdestim. Úı jekemenshik páter ıeleri kooperatıvine qaraıdy. «Jekemenshikke» jeńildik qarastyrylmaǵan. Sondyqtan, qajetti qarajatty turǵyndar ózderi jınaýy nemese jańǵyrtý baǵdarlamasyna qatysýy kerek. Basqa baspana taýyp berýge múmkindik joq. Jezqazǵanda jaǵdaıy kelispegen úı jalǵyz ol emes».
Jezqazǵan qalasy ákiminiń orynbasary Nurjan Orynbaev osylaı dedi.
«Kommýnaldyqty» qaıtedi?
О́tken ǵasyrdyń ortasynda salynǵan úıden úmit shamaly. «Odan da ony súrip tastap, ornyna jańadan turǵyzǵan áldeqaıda tıimdi», deıdi qurylysqa kóziqaraqtylar. О́kinishtisi, jańasy da jetisip jatqan joq.
Metallýrgter qalasyndaǵy Sátbaev dańǵylynyń boıynda 2008 jyly paıdalanýǵa berilgen kóp qabatty turǵyn úı bar. Sonyń toǵyz jylǵa jetpeı-aq toz-tozy shyqty. №89 «a» úı eki jyldan ke-
ıin «apatty» tizimine ilikti. Keıingi jeti jylda turǵyndardyń kórgenin eshkimniń basyna bermesin.
Bes qabatty jańa úıdiń jertólesi basseınge bergisiz. Kólkigen sý belden keledi. Onyń sońǵy ret qashan qurǵatylǵany eshkimniń esinde joq. О́ıtkeni, jertóleniń torly esigine jaqyndap, bosaǵadan qulaq salsań, sýdyń syldyry estiledi.
Demek, úıdiń qubyrynan ketip jatyr. Olaı bolmasa, turǵyn úı turǵyzylǵan jerdiń astyndaǵy basqa qubyrdan atqylaýda. Nemese, tastaqty tustan tesip shyqqan bulaqtyń kózi de bolýy múmkin. Áıteýir, turǵyndardyń aıtýyna qaraǵanda, jasalǵan saraptama aýyz sý ekenin kórsetipti.
Ákimdikte bul úıde turatyndardy jaqsy tanıdy. Olar ótinýden, aryzdanýdan, jazýdan jalyqqan emes. Tabaldyryqty tozdyrǵan turǵyndar «Jergilikti bılik birdeńe isteýge mindetti!» – deıdi biraýyzdan. О́ıtkeni, ol – ákimdiktiń kommýnaldyq menshigi. Qoljetimdi baspana baǵdarlamasymen salynǵan.
Turǵyn úı-kommýnaldyq sharýashylyǵy bóliminiń málimetinshe, bıyl apatty úılerge bıýdjetten qarajat qarastyrylmaǵan. Kóshirýge de, ótemaqy tóleýge de. Tek kommýnaldyq menshiktegi úılerdiń aqaýyn anyqtaý ǵana josparlanǵan.
«Apat aıtyp kelmeıdi», alaıda «kún kúrkiremeı» qozǵalmaıtyn boldyq qoı?!
Álibek ÁBDIRASh
Qaraǵandy oblysy,
Jezqazǵan qalasy
