Pavlodar oblystyq dene shynyqtyrý jáne sport basqarmasynyń málimetinshe, bıyl bul jobalar qatarynda Pavlodardaǵy Ýsolka shaǵyn aýdanynda halyqaralyq standarttarǵa saı 300 oryndyq trıbýnasy bar 50 metrlik júzý basseıniniń qurylysy bastalady. Al Baıanaýylda taý shańǵysy kesheniniń jobasy ázirlik ústinde. О́ńirde erkin kúres zaldary jańǵyrtylyp, Pavlodar, Ekibastuz jáne Aqsý qalalarynda 32 strıt-vorkaýt (street workout) jattyǵý qondyrǵylaryn jáne oıyn alańdaryn ornatý josparda bar. Jalǵyz Baıanaýyl emes, óńirdegi ár aýdanda sportqa erekshe kóńil bólinýde. Sondyqtan, oblystyq ákimdikte ótken otyrysta sportqa jaýapty tulǵalar «Bizdiń óńir úshin 2017 jyldy sport jyly dep ataýǵa bolady», dep atap ótti.
ERG kompanııasy men oblys ákimdigi arasynda jasalǵan memorandýmǵa sáıkes, jergilikti dene shynyqtyrý jáne sport basqarmasy Baıanaýyl aýdandyq ákimdiginiń «Ulttyq saıabaq» basshylyǵymen birlesip, taý shańǵysy keshenin salý úshin jer telimin bólý máselesimen aınalysýda. Sonymen qatar, jol, elektr jelisin tartý sııaqty jumystar bastalyp ta ketken.
Basqarma joba boıynsha oblys ortalyǵynda 164 mıllıon teńgege eki kúres zalyn qaıta qurýdy josparlaǵan. Ortalyq jaǵajaıda, sondaı-aq, qaladaǵy 33 turǵyn úıdiń aýlasynda jáne Aqsýdaǵy 10 alańda vorkaýt qurylǵylaryn ornatpaqshy. Bul maqsatta «Samuryq-Qazyna Trast» qorynyń qoldaýymen óńirde plastıkten jasalǵan qorshaýlary bar hokkeı korty, kúsh jattyǵý qurylǵylary, shaǵyn fýtbol, strıt-vorkaýt, strıtbol alańdary jáne balalarǵa arnalǵan 10 ınklıýzıvti, kóp fýnksııaly alańqaılar ornatylady. Olardyń segizi – Pavlodar, Ekibastuz jáne Aqsý qalalarynda oryn teppekshi.
– Sonymen birge, bıyl Qashyr aýdanynyń ortalyǵy Tereńkólde, Aqsý qalasynyń Evgenevka, Qyzyljar aýyldarynda dene shynyqtyrý-saýyqtyrý keshenderi boı kóteredi. Oblystyń úsh qalasynda, sondaı-aq, Baıanaýyl aýylynda 200 mıllıon teńgege fýtbol alańdary salynady. Memleket-jekemenshik áriptestik jelisi boıynsha oblys ortalyǵynda jabyq fýtbol kesheniniń qurylys jumystary qolǵa alynady. Jýyq arada onyń eskızdik jobasy tanystyrylatyn bolady, – deıdi oblystyq dene shynyqtyrý jáne sport basqarmasynyń basshysy Marat Aıdashev.
Taǵy bir jaqsy jańalyq – endi qala turǵyndary men qonaqtar oblys ortalyǵyndaǵy Ýsolka ózeninde qaıyqqa minip, eskek esetin bolady. О́ıtkeni, buryn bul jerde arnaıy qaıyq bazasy bolǵan-dy. Eskek esý seksııasy ashylmaqshy. Qajetti qural-jabdyqty satyp alýǵa jáne ózen jaǵasynda qaıyqtardy saqtaýǵa arnalǵan ellıng salýǵa konkýrs jarııalanyp ta qoıypty. Akademııalyq eskek esýshilerdi daıyndaıtyn jattyqtyrýshylar da bul iske jumyldyrylmaqshy.
Farıda BYQAI,
«Egemen Qazaqstan»
Pavlodar oblysy
