Elbasy Nursultan Nazarbaevtyń osy jyly Qazaqstan halqyna joldaǵan «Qazaqstannyń úshinshi jańǵyrýy: jahandyq básekege qabilettilik» atty joldaýynda ekonomıkany jedel tehnologııalyq jańǵyrtý birinshi baǵytta aıtyldy. Memleket basshysy elimizdegi jańa ındýstrııalarmen keleshegi bar 3D baspa, onlaın saýda, mobıldi bankıng, sandyq qyzmet sııaqty salalarǵa basa kóńil bólý kerek ekenin aıtqan bolatyn.
Sonymen qatar, ǵylymı jáne ınnovasııalyq qýatty joǵarǵy oqý oryndary men ınnovasııalyq tehnologııalyq parkterdi Alataý aımaqtyq bazasynda damytý kerektigine erekshe toqtalǵan edi. Búgingi kóshpeli otyrystyń da negizgi maqsaty – Elbasy Joldaýynda aıtylǵan mindetterdi iske asyrý. 2003 jyly qurylǵan ekonomıkalyq aımaqqa memleket tarapynan 24 mlrd teńge jumsalǵan. Qazirgi tańda ınnovasııalyq jobalardyń aldy sapaly ónim shyǵara bastady. Tipti, kommýnıkasııalyq quraldardy otandyq naryqpen qatar, kórshilis elderge de eksporttaýda.
Búgingi basqosýǵa bastamashy bolǵan ekonomıkalyq saıasat, ınnovasııalyq damý jáne kásipkerlik komıtetiniń quramynda komıtet tóraǵasy Asqar Beısenbaev bastaǵan Talǵatbek Abaıdildın, Mıhaıl Bortnık, Bekmyrza Elamanov, Muratbaı Joldasbaev, Ashat Kúzekov, Eleýsin Saǵyndyqov syndy Joǵary palata ókilderi ınnovasııalyq baǵytta jumys isteıtin óndiristiń qýatymen tanysty. Sondaı-aq, «NurOtan» partııasy fraksııasy janyndaǵy aımaqtyq saıası keńes músheleri men Parlament májilisiniń depýtattary da shaǵyn jáne orta bıznesti damytý tetikteri jaıly oılaryn ortaǵa saldy.
«Alataý parkiniń jumysymen tanysý barysynda, atalmysh nysan dırektorynyń usynǵan josparlary men bólisken oılary kóńilimizden shyqty. Qazaqstannyń dál qazirgi kezdegi orny, aldaǵy ýaqytta taǵy da qandaı maqsattar qoıylatyny, olardy oryndaý joldary, nysandardy aralaý barysynda tolyq talqylandy. Atalmysh óndiris ornynda shyǵyp jatqan ónimdermen tanysyp qana qoımaı, óndirýshilermen suhbattasa kele qazirgi zańnyń kemshin tustary men olarǵa qandaı ózgeris engizý kerektigin, Úkimet tarapynan qandaı kómekke muqtaj ekendigin bizge jetkizdi. Bul kisilerdiń aıtqan ótinishterin óz nazarymyzǵa alyp komıtet otyrystarynda usynystarymyzdy daıyndaıtyn bolamyz. Komıtetimizdiń negizgi maqsaty – kásipkerlikti qoldaý. Elbasy tapsyrmasymen shaǵyn jáne orta bıznestiń kólemin eń kem degende 50%-ǵa ósirý kózdelip otyr. Eger shaǵyn jáne orta bıznestiń kólemi 50%-dan asatyn bolsa qoǵam ornyqty qoǵam bolyp sanalady», deıdi ekonomıkalyq saıasat, ınnovasııalyq damý jáne kásipkerlik komıtetiniń tóraǵasy Asqar Beısenbaev.
Jıyn barysynda qatysýshylar tarapynan kásipkerlerge kedergi bolatyn jaǵdaılardyń biri – memlekettik fýnksııalardyń kóptigi men ruqsat berý fýnksııalary ekendigi aıtyldy.
«Biz memlekettik fýnksııalardyń barlyǵy «100 naqty qadam» ulttyq josparyna baılanysty ózin-ózi basqarý júıesine berilýge tıis dep esepteımiz. Iаǵnı, úkimettik pýnksııa Úkimettiń tarapynan bızneske berilýi qajet. Osyǵan tosqaýyl bolatyn kedergilerdiń barlyǵyn zań júzinde retteýimiz kerek», dedi komıtet músheleri.
Arman OKTIаBR,
«Egemen Qazaqstan»
