О́ńirimiz jáne tutastaı elimiz úshin iri jobany júzege asyrýǵa qatysty máseleler «AltynExCompany» AQ ken óndirý kásipornynyń basshylyǵynyń oblys ákimi Berdibek Saparbaevpen kezdesýi barysynda áńgime ózegine aınaldy. Oblysta jylyna 5 mıllıon tonnaǵa deıin altyn quraıtyn kendi óńdep, altyn aıyryp alýshy fabrıka salynatyn boldy.
«AltynExCompany» kompanııasy Muǵaljar aýdanyndaǵy Altyndy poselkesinde «Iýbıleınoe» altyn keni ornyn 2015 jyldyń qazan aıynan ıgerýde. Kásiporyn jer asty ádisimen jylyna 300 myń tonna ken óndiredi.
Kásiporynnyń óńirlik dırektory Orman Túzelbaev strategııalyq josparlarymen bólisti.
«Qazirgi ýaqytta biz ashyq ádispen az quramdy altyny bar kendi ıgerýge kóshýdi josparlap otyrmyz. 2017 jyly altyn aıyryp alatyn fabrıkanyń qurylysyn jobalap, qurylysyn bastaýdy qolǵa almaqpyz. Bul joba bizge Dore quımasyn shyǵarýmen jutań kendi óńdeýge múmkindik beredi, biz qurylys kezinde 800 adamdy jumyspen qamtımyz, nysan paıdalanýǵa berilgennen keıin 700 adamǵa deıin jumys isteıtin bolady. Jobanyń jalpy quny — 100 mıllıard teńge. Naryqtyń qolaıly konıýnktýrasynda geologııalyq barlaý jumystaryna 5-7 mıllıard teńgege deıin qarjyny ınvestısııalaý josparlanýda», – dep oblys ákimin habardar etti «AltynExCompany» ókili.
О́ńir basshysy kásiporynnyń turǵyndardyń áleýmettik máselelerin sheshý boıynsha ózine alǵan mindettemelerdi oryndaý barysy týraly sóz qozǵady. Qazirgi ýaqytta Altyndy poselkesinde balalar baqshasy, sondaı-aq jumysshylar ashanasy salynyp, jumys istep tur.
Joba jańa mamandyqtar qurýǵa, qazaqstandyq kadrlardy oqytýǵa jáne biliktiligin kóterýge múmkindik beredi dep kútilýde. 2021 jyly jobalyq qýatqa engennen keıin bıýdjetke jyl saıynǵy aýdarylymdar 10 mıllıard teńge shamasyn quramaqshy.
Kásiporyn basshysy oblys ákiminiń birqatar problemalardy sheshýge yqpal etýin surady. Bul negizinen ınfraqurylymdardy júrgizýge, ıaǵnı gaz, elektr, sýmen qamtý jelilerin júrgizýge, avtojol qurylysyn salýǵa qatysty. Budan basqa, kompanııa basshylyǵy qurylys-montaj jumystary men jabdyqtar shyǵyndaryn jabýǵa ınvestısııalyq sýbsıdııa alýǵa, salyq jeńildikterine jáne qural-jabdyqtardy, shıkizattar men materıaldardy ákelýde keden salyqtary tóleminen bosatýǵa qoldaý jasaýdy surady.
«Biz óńir úshin mańyzdy jobany qoldaımyz, «Bıznestiń jol kartasy» baǵdarlamasy aıasynda ınfraqurylymdar júrgizýge kómektesemiz, biraq jergilikti turǵyndardy áleýmettik qoldaý boıynsha ózderińiz qabyldaǵan barlyq mindettemelerińizdi oryndaıtyn bolyńyzdar», – dedi oblys ákimi kezdesý qorytyndysynda.
Satybaldy SÁÝIRBAI
"Egemen Qazaqstan"
