San ǵasyrlyq tarıhy bar aıtys ónerinde tuǵysh ret egizder aıtysty. Astanadaǵy №51 mektep-gımnazııasynda Táýelsizdiktiń 25 jyldyǵy qarsańynda ótken merekelik sharada Sarybaı Erasyl men Bekasyl aıtysyp, ulttyq ónerimizdi dáriptedi.
Alǵash ret mektep sahnasynda tusaýy kesilip, aıtys ónerine qanat qaqqaǵan oqýshylarǵa aıtysker aqyn Balǵynbek Imashev batasyn berdi. «Men aıtysty kóp zerttedim. Tarıhqa kóz júgirtsek, áke men bala, atasy men kelini, aǵasy men inisi, týystyq qatynastaǵy adamdardyń aıtysy bar. Al anasynyń qursaǵynan egiz bolyp týylǵan jandardyń aıtysyn birinshi ret kórip turmyn. Eger bul balalar ulttyq ónerimizdi qasterlep, dombyrany qoldarynan tastamaı aıtysqa bet bursa, tarıhtaǵy tuńǵysh aıtysqan egizder bolyp qalady», – dedi ol. Sonymen qatar, Balǵynbek Imashev jas aıtyskerlerge batasyn erip, ekeýinen úlken úmit kútetinin jetkizdi.
Sondaı-aq, merekelik sharada teatr jáne kıno salasyndaǵy tanymal akterler Dosymhan Beısenbaev pen Ádil Ahmetov ustazdar men oqýshylarǵa óner salasyndaǵy jetistikter men elimizdiń damýy aıasynda maǵynaly sózder aıtyp, kórermenniń saýaldaryna jaýap berdi.
«Elbasymyz Nursultan Nazarbaev aıtqandaı, Qazaqstannyń bolashaǵy jastardyń qolynda. Sondyqtan da sender jaqsy azamat bolyp qalyptasýlaryń úshin bilimge den qoıyńdar. Bolashaqtyń kilti bilimde. Osy bastan ilim-bilimdi tereń meńgerseńder, qazaq eliniń qaryshtap damýyna súbeli úles qosatyn azamat bolyp shyǵasyńdar. Bilim senderdiń ómirlik azyqtaryń», – dedi Ádil Ahmetov.
Shara barysynda oqýshylar qonaqtarǵa óz ónerlerin kórsetti. Mektep dırektory Kúnimhan Dúısenova kelgen qonaqtarǵa rızashylyǵyn bildirdi.
Talǵat RAIYMBEK, "Egemen Qazaqstan".
