QR Úkimeti jańa «Nurly Jer» baǵdarlamasyn talqylady

QR Úkimeti qazaqstandyq otbasylar úshin baspana máselesin sheshýdiń jańarǵan tetikter qamtylǵan «Nurly Jer» baǵdarlamasyn jasaǵan. Ulttyq ekonomıka mınıstri Qýandyq Bıshimbaev Úkimet otyrysynda baǵdarlamanyń basym baǵyttary ıpotekalyq qaryzdardy sýbsıdııalaý arqyly ıpotekalyq nesıe berýdi qoldaý, qurylys kompanııalary úshin qaryz mólsherlemesiniń bir bóligin jabý jolymen jeke qurylys salýshylardy yntalandyrý, Turǵyn úı qurylys jınaq bankiniń salymshylary jáne ákimdikterde kezekte turǵan azamattar úshin nesıelik turǵyn úı qurylysynyń kólemin ulǵaıtý bolatynyn baıandady. Sondaı-aq, baǵdarlama aıasynda halyqtyń áleýmettik jaǵynan osal toptary úshin satyp alý quqyǵynsyz jalǵa beriletin turǵyn úıdiń óńirlik qoryn qurý, qajetti ınfraqurylym júrgizý arqyly jeke turǵyn úı qurylysyn damytý josparlanǵan. «Nurly Jer» baǵdarlamasyn júzege asyrýdyń nátıjesinde 1,5 mln. sharshy metr turǵyn úı salynady, onyń ishinde 2017-2019 jyldary 274 myń sharshy metr turǵyn úı salý josparlanǵan. Eske sala keteıik, aǵymdaǵy jyldyń qyrkúıek aıynda QR Prezıdenti Nursultan Nazarbaev Úkimetke jańa mindetter júktep, taıaý bolashaqtaǵy basymdyq beriletin jumystardy aıqyndap bergen bolatyn. Úkimetke birneshe memlekettik baǵdarlama daıyndaý tapsyryldy, onyń ishinde nátıjeli eńbekpen qamtý jáne ózin ózi jumyspen qamtyǵan azamattardy shaǵyn jáne orta bızneske tartý baǵdarlamasy, 2017-2021 jyldarǵa arnalǵan agroónerkásip keshenin damytý baǵdarlamasy jáne «Nurly Jer» turǵyn úı salý baǵdarlamasy bar. Arnur ASQAR, "Egemen Qazaqstan".