Qazaqstandyq paralımpıadashylar Máskeý kýbogyn jeńip aldy

At sportynan múmkindigi shekteýle jandar arasyndaǵy saıysta Qazaqstan quramasy bir altyn jáne eki kúmis medaldar enshiledi, dep habarlaıdy QazAqparat. Jarystar 6-9 jeltoqsan aralyǵynda Máskeý túbindegi Hımkı qalasynda ótti.  El namysyn paralımpıadashy tórt sportshy qorǵady. Onyń úsheýi oljaly oraldy. QR Ulttyq paralımpıada komıtetiniń saıtynda jarııalanǵan aqparatqa sáıkes, altyndy V testinde Dıas Eskermesov jeńip aldy. «Alǵashqy úıretý» synaǵy boıynsha A testinde Almas Isanov ekinshi orynǵa ıe boldy. Qazaqstanǵa taǵy bir kúmis medaldi Aıǵanym Ermekova alyp keldi. Ol Derbı testi jáne mýzykalyq súıemeldeýmen erkin baǵdarlama boıynsha óner kórsetti. Olardyń árqaısysynda ekinshi oryndy ıelenip, nátıjesinde kúmis alqa taǵyndy. Jarystardyń jeńimpazy Dıas Eskermesov 2015 jyly Los-Andjeleste ótken Dúnıejúzilik jazǵy Arnaıylandyrylǵan Olımpıada oıyndaryna qatysqan bolatyn. Sportshy úsh medal - altyn, kúmis jáne qolany enshilep qaıtqan edi. 2015 jyldyń sońynda odan aqyl-esiniń kemistigi dıagnozy alynyp, ol kolledjge oqýǵa túse aldy. «Qolda bar bazany úsh-tórt atpen tolyqtyryp, bapkerlik quramnyń biliktiligin azdap joǵarylatyp jiberse, aldymen reıtıngilik, odan ári - tórt jyldan keıin Tokıoda ótetin dúnıejúzilik halyqaralyq Paralımpıada oıyndaryna qatysý týraly oılastyrýǵa bolatyn edi», - dep jazylǵan Qazaqstan Ulttyq paralımpıada komıtetiniń saıtynda.