OQO-da táýelsizdiktiń 25 jyldyǵyna arnalǵan kitaptar jaryq kórdi

Búgin Ońtústik Qazaqstanda el Táýelsizdiginiń 25 jyldyq mereıtoıyna arnalyp jaryq kórgen «Táýelsizdik tebirenisteri» shyǵarmalar jınaǵy men «Táýelsizdiktiń 25 juldyzdy sáti» fotoalbomynyń, «Qazaqstan joly: Ult kóshbasshysymen birge 25 jyl beıbitshilik pen jasampazdyq» halyqaralyq ǵylymı-tájirıbelik konferensııasynyń eńbekterinen jınaqtalǵan úsh kitaptyń tusaýkeser rásimi ótip, jańa týyndylardyń kórmesi uıymdastyryldy, dep habarlady OQO ákiminiń baspasóz qyzmeti. Sonymen birge, osy kúni kelýshiler nazaryna egemendik jyldarynda Elbasymyzdyń Ońtústikke jasaǵan saparlary men óńirde atqarylǵan ıgilikti ister baıandalǵan «Táýelsizdik Tuǵyrym» derekti fılmi tuńǵysh ret usynylyp, tanystyryldy. «Otyrar» oblystyq ǵylymı-ámbebap kitaphanasynda ótken sharaǵa oblys ákimi Janseıit Túımebaev pen zııaly qaýym ókilderi, oblys ardagerleri men mádenıet jáne óner mekemeleriniń qyzmetkerleri, joǵary oqý oryndarynyń oqytýshylary, ǵalymdar jáne BAQ ókilderi qatysty. Saltanatty sharada sóz bastaǵan oblys ákimi Janseıit Túımebaev shırek ǵasyrlyq osynaý uly dýmanda mundaı shyǵarmashylyq týyndylardyń jasalyp, keıingi urpaqqa estelik retinde qalýy mańyzdy ekenine toqtaldy. Oblys ákimi kitaphana basshylyǵyna Túrkııa elinen arnaıy joldanǵan Elbasy týraly birneshe jýrnal men kitaptardy da tartý etti. Túrik eliniń sazgerleri ázirlegen Elbasy týraly ánder jınaǵyn da arnaıy tanystyrdy. «Táýelsizdik tebirenisteri» kitabynda óńirimizdiń aıtýly qalamgerleriniń týyndylary jınaqtalyp, jarııalanǵan. «Qazyǵurt» baspasynan 1000 danamen jaryq kórip, tusaýy kesilgen jınaq «Poezııa», «Proza», «Pýblısıstıka» atty úsh bólimnen turady. «Táýelsizdiktiń 25 juldyzdy sáti» kitabynda – Ońtústik Qazaqstan oblysynyń shırek ǵasyrdaǵy jetistikteri baıandalady. Munda óńirdegi ár sala boıynsha 25 jyldyq kórsetkishter pash etilip, oblys halqynyń osy shırek ǵasyr ishindegi tar jol, taıǵaq keshýden ótip, nebir qıyndyqqa qaıyspaı etken eńbegi, tógilgen mańdaı teri, qol jetken jetistigi qamtylady. Al úshinshi basylym - «Qazaqstan joly: Ult kóshbasshysymen birge 25 jyl beıbitshilik pen jasampazdyq» halyqaralyq ǵylymı-tájirıbelik konferensııasynyń qundy eńbekterinen jınaqtalǵan kitapta taıaýda Muhtar Áýezov atyndaǵy Ońtústiktik Qazaqstan memlekettik ýnıversıtetinde ótken halyqaralyq ǵylymı konferensııadaǵy ǵylymı maqalalar oryn alǵan. Onda AQSh, Kanada, Irlandııa, Ońtústik, Koreıa, Reseı Federasııasy syndy meleketter ǵalymdarynyń ortaq talqyǵa túsken 300-deı baıandamalaryn oqýǵa bolady. «Táýelsizdik - tuǵyrym» derekti fılminde QR Prezıdenti N.Nazarbaevtyń oblysqa jasaǵan saparlary men óńirimizde atqarylǵan ıgilikti isterge qatysty ázirlengen. Elbasy ońtústikke 40-tan astam ret sapar jasasa, tek Túrkistan qalasynyń ózine 13 ret atbasyn buryp, onda 6 ret Memleket basshylarymen resmı kezdesýler ótkizipti. Fılmde Elbasynyń sol kezderdegi belgili bir qoǵamdyq qubylystar men oqıǵalarǵa baılanysty bildirgen pikirleri men aıtqan oılary kórsetilgen. Eńbek Ońtústik Qazaqstan oblysy ákimdiginiń tapsyrysy boıynsha «Saq» kınostýdııasynda jasalǵan.