Keshe Astanada Memlekettik hatshy Gúlshara Ábdiqalyqova el damýy jolynda aıanbaı eńbek etip júrgen bir top azamatqa memlekettik nagradalar tapsyrdy. Marapattalǵandar qatarynda memlekettik qyzmetshiler, mádenıet, bilim men ǵylym jáne densaýlyq saqtaý salalary men bıznes ókilderi boldy.
Shara barysynda Gúlshara Ábdiqalyqova ulttyq merekemiz – Táýelsizdik kúni qarsańynda joǵary nagradalardy tapsyrý ıgi dástúrge aınalǵanyn aıta kelip, bul kúnderi búkil elimiz qoǵamdy damytýǵa jáne Qazaqstan Respýblıkasynyń táýelsizdigin nyǵaıtýǵa qosqan jeke úlesi úshin kópshilik qurmetine bólenip, erekshe kózge túsken qazaqstandyqtardy marapattap jatqanyna toqtaldy. Sondaı-aq, ol Táýelsizdiktiń 25 jylynda elimizde áleýmettik-ekonomıkalyq damýdyń qazaqstandyq modeli qalyptasyp, demokratııalyq saıası júıe jáne júzden asa etnos pen 18 konfessııa ókilderiniń basyn qosqan etnosaralyq kelisimniń biregeı ınstıtýty – Qazaqstan halqy Assambleıasy qurylǵanyn, qol jetkizilgen tabystar Qazaqstan Prezıdentiniń strategııalyq turǵydan oılaı biletin kóregendigi men saıası erik-jigeriniń aıqyn kórinisi, el azamattarynyń qaltqysyz qyzmeti men qajyrly eńbeginiń nátıjesi ekenin atap kórsetti.
– Igi dástúr boıynsha jyl saıyn Táýelsizdik kúni qarsańynda Memleket basshysy Nursultan Nazarbaev el damýyna eńbegin sińirgen Qazaqstan azamattarynyń eleýli tobyn memlekettik nagradalarmen marapattaıdy. Bıyl elimizdiń mártebeli mereıli belesinde Elbasynyń Jarlyǵymen 2 710 adam joǵary memlekettik nagradaǵa ıe boldy. Bul el Prezıdentiniń Qazaqstan azamattarynyń, onyń ishinde sizderdiń Táýelsizdikti nyǵaıtýdaǵy eńseli eńbekterińizge bergen joǵary baǵasy dep qabyldaýymyz kerek. El Táýel-
sizdiginiń bıylǵy mańyzdy belesi barsha halqymyz úshin merekege aınalýda. Ata-babalarymyz ańsap ótken Táýelsizdik 1991 jylǵy 16 jeltoqsan kúni «Qazaqstan Respýblıkasynyń memlekettik táýelsizdigi týraly» Zań qabyldanǵannan keıin bastalǵany málim. Shırek ǵasyrda álemdik deńgeıdegi tulǵa – Elbasynyń syndarly saıasatynyń arqasynda Qazaqstan demokratııalyq, saıası-quqyqtyq júıesi bar, ekonomıkasy turaqty, halqynyń ál-aýqaty joǵary, jahanǵa beıbit tirlik, berekeli damýmen tanylǵan mártebeli memleket retinde qalyptasty, – dedi Memlekettik hatshy. Odan ári G.Ábdiqalyqova az ǵana ýaqyttan keıin nagrada alǵaly turǵandardyń ishinde ár alýan mamandyq ıeleri bar ekenin aıta kelip, Táýelsizdik tuǵyryn bekitý jolynda ter tógip júrgen bul azamattardyń Qazaqstandy jańa bıikke bastap, eńbekte jemisti nátıjeler kórsete beretinine senim bildirdi.
Sonymen, memlekettik, qoǵamdyq qyzmette sińirgen eńbegi, eldiń áleýmettik-ekonomıkalyq jáne mádenı damýyna, halyqtar arasyndaǵy dostyq pen yntymaqtastyqty nyǵaıtýǵa qosqan eleýli úlesi úshin III dárejeli «Barys» ordeni «Qazaq tamaqtaný akademııasy QB» JShS prezıdenti T.Sharmanov pen Qarjy mınıstrliginiń jaýapty hatshysy N.Korjovaǵa berildi. Budan keıin, «Parasat» ordenimen – «Egemen Qazaqstan» gazetiniń sholýshysy, belgili qalamger S.Mámet, «Qazatomónerkásip» UAK» AQ basqarma tóraǵasy A.Jumaǵalıev, «Qazaq memlekettik qyzdar pedagogıkalyq ýnıversıteti» RMK rektory D.Núketaeva, aqyn S.Turǵynbekuly, Qazaqstannyń qol doby federasııasynyń qurmetti prezıdenti D.Turlyhanov, Memlekettik kúzet qyzmeti Prezıdenttik orkestriniń bas solısi J.Baqtaı, «Ulttyq óner» JShS dırektory T.Býrmıstrova, Sáýletshiler odaǵynyń prezıdenti A.Rústembekov, Qaýipsizdik Keńesi hatshylyǵynyń meńgerýshisi S.Táńirbergen, Prezıdent Keńsesi bastyǵynyń orynbasary B.Temirbolat, Prezıdent Ákimshiliginiń bólim meńgerýshisi Ǵ.Tileýbekov marapattaldy.
Al II dárejeli «Dostyq» ordeni «Jastar teatry» MKQK kórkemdik jetekshisi N.Jaqypbaı men «Memlekettik respýblıkalyq koreı mýzykalyq komedııa teatry» RMQK dırektory L.Nıge tapsyryldy.
«Qurmet» ordenine – Prezıdent Ákimshiligi bólim meńgerýshisiniń orynbasary S.Aıdarbekov, Prezıdent Baspasóz hatshysynyń orynbasary M.Ákimjanova, Sh.Aımanov atyndaǵy «Qazaqfılm» AQ vıse-prezıdenti S.Jubandyqov, «North Caspian Operating Company» kompanııasynyń dırektory R.Áýbákirov, Prezıdent Ákimshiliginiń bólim meńgerýshisi N.Galıhın, Kókshetaý qalasyndaǵy «Krasnyı Iаr №1 orta mektebi» KMM muǵalimi O.Mýrzageldınova, Qazaq ulttyq óner ýnıversıtetiniń dosenti U.Núsipáli, «Ulttyq shtattyq komandalar jáne sport rezervi dıreksııasy» RMQK nusqaýshy-sportshysy D.Sádýaqasova, Almaty oblysyndaǵy «Kormovık» JShS bas dırektory N.Sydyqov, Prezıdent Ákimshiliginiń bólim meńgerýshisi Á.Tursynov, Prezıdent Ákimshiliginiń Basshysy hatshylyǵy meńgerýshisiniń orynbasary Iý.Cherkasov laıyqty dep tanyldy.
Sonymen qatar, III dárejeli «Eńbek Dańqy» ordeni Qaraǵandy qalasyndaǵy «Arselor Mıttal Temirtaý» AQ Kómir departamenti I.Kostenko atyndaǵy shahtasynyń jumysshysy Q.Súleımenovke, Qyzylorda oblysyndaǵy «Aral balyq óńdeý zaýyty» JShS aǵa sheberi K.Kemalovaǵa, Soltústik Qazaqstan oblysyndaǵy «Nejınka-Erke» JShS saýynshysy R.Iаsýkovaǵa berildi.
«Qazaqstannyń eńbek sińirgen qaıratkeri» qurmetti ataǵymen «Qazaq áýenderi» AQ fılıaly – «Gúlder» ansambliniń ánshisi Ulyqpan Joldasov, «Dos-Muqasan» ansambliniń kórkemdik jetekshisi Murat Qusaıynov, «Qazaqstan halqynyń rýhanı damý qory» AQ prezıdenti J.Boldyqova, «N.Sas atyndaǵy orys memlekettik akademııalyq balalar men jasóspirimder teatry» RMQK dırektory N.Gorobes, «Astana Opera» memlekettik opera jáne balet teatry» KEAQ jetekshi opera solısi J.Ǵabdýllına, «Qazaq áýenderi» AQ fılıaly «Gúlder» ansambliniń ánshisi N.Qonysbaev, «Qazaqkonsert» memlekettik konserttik uıymy» RMQK ártisi E.Rysqalı marapattaldy.
Al «Eren eńbegi úshin» medali Prezıdent Ákimshiligi bólim meńgerýshisiniń orynbasary N.Kýzmın men Prezıdent Ákimshiligi bólim meńgerýshisiniń orynbasary E.Qudaıbergenovke berildi.
Jıyn sońynda G.Ábdiqalyqova qatysýshylardy alda kele jatqan Táýelsizdik kúnimen quttyqtap, barshaǵa beıbitshilik pen baq-bereke, Otanymyzdyń ıgiligi jolyndaǵy eńbekterine tabys tiledi.
Joldybaı BAZAR,
«Egemen Qazaqstan»
Sýretterdi túsirgen
Erlan OMAROV,
«Egemen Qazaqstan»
