Qazaqstan men Izraıl arasynda aýyl sharýashylyǵyndaǵy yntymaqtastyq týraly úkimettik kelisimge qol qoıylady. Bul týraly búgin Aqordada elimizge alǵashqy resmı saparmen kelgen Izraıl Premer-mınıstri Bınıamın Netanıahýmen keńeıtilgen quramdaǵy kelissózder barysynda QR Prezıdenti Nursultan Nazarbaev aıtty, dep habarlaıdy QazAqparat.
"Bizdiń ekijaqty qarym-qatynasymyz saýda-ekonomıkalyq ózara is-qımyl men ınvestısııalyq yntymaqtastyq negizinde qalyptasýda. Onyń nyǵaıýyna ızraıldik kapıtal salynǵan 270 kásiporyn óziniń mańyzdy úlesin qosady. Jeke kezdesýimiz barysynda ekijaqty qarym-qatynastyń ekonomıka, ınvestısııa, saıasat salalary, lańkestikpen kúres syndy - keń aýqymdy máselelerin talqyladyq. Sizdiń búgingi saparyńyz jáne bıznes forýmdy ótkizý - bizdiń iskerlik qarym-qatynasymyzdy keńeıtýge septigin tıgizerine jáne jańa sapaly deńgeıge kóteretindigine úmit artamyz", - dedi Nazarbaev.
Osy oraıda Elbasy Qazaqstan-Izraıl seriktestigin ártaraptandyrý mańyzdylyǵyn atap ótti jáne shıkizattyq modelden óndiriske kóshý úshin birlese jumys isteýge múddelilik bar ekendigin aıtty. Sonymen qatar ekijaqty yntymaqtastyqty eseleı túsetin salany da atady.
«Aýyl sharýashylyǵy bizdiń eń basty túıisý núktemiz sanalady. Bul jaıynda men sizge aıttym da. Bizde aýyl sharýashylyǵy bıznesin júrgizý úshin biregeı múmkinshilik, al Izraılde aldyńǵy qatarly tehnologııa bar. Biz bul máseleni jan-jaqty talqyladyq. Birlesken komıssııa quryp, bul máselede naqty shart ázirleıtin bolamyz. О́nimniń barlyq túrin qaıta óńdeý, jerdi sýlandyrý - bul bizdiń sizderden alǵymyz keletin máseleler. Sizdiń saparyńyz aıasynda búgin aýyl sharýashylyǵy salasyndaǵy yntymaqtastyq týraly úkimettik kelisimge qol qoıylady. Osyǵan arqa súıeı otyryp, biz naqty jumystar júrgize alamyz», - dedi Memleket basshysy.
Sýretterdi túsirgen Erlan Omarov, "Egemen Qazaqstan".
