Kovalev: Golovkınnen qatty soqqy alǵanym ras

Reseılik boksshy Sergeı Kovalev qazaqstandyq Gennadıı Golovkınnen nokdaýn alǵanyn moıyndady. Bul týraly vesti.kz habarlady. Bir kezderi qos boksshy Abel Sanchestiń qol astynda jattyqqan bolatyn. Alaıda, belgili bir sebepterge baılanysty reseılik sportshy 2012 jyly áriptestigin toqtatqan. Brıtanııalyq Djonnı Nılson sparrıng kezinde Kovalevtiń Golovkınnen qatty soqqy alyp, eseńgirep qalǵany týraly tilshilerge suhbat bergen. Mine, osydan keıin bul jaıt kópshilik arasynda qyzý talqylanǵan. Kóp uzamaı mundaı jaǵdaıdyń bolǵanyn reseılik sportshynyń qazirgi bapkeri Devıd Djekson rastady. Degenmen, sol tusta Sergeıdiń jattyǵý zalynda alǵashqy kúni bolǵandyqtan qalypty deńgeıinde judyryqtaspaǵanyn aıtty. Al Kovalevtiń ózi buǵan deıin bul jaıdy teriske shyǵarǵanmen, qazir oqıǵanyń qalaı órbigenin málimdedi. «Iá, demalystan keıin Abel Sanchestiń jattyǵý lagerine kelip, Golovkınmen sparrıng ótkizgenim ras. Onyń soqqysy myǵym eken. Kezekti bir soqqysynan keıin edenge qulap tústim. Biraq ornymnan turyp, ary qaraı jalǵastyrýǵa múmkindigim boldy. Bul úshin uıalamyn dep aıta almaımyn. Biz bı bılep júrgen joqpyz, boks bolǵandyqtan bul qalypty jaǵdaı. Onyń ústine sol ýaqytta Chelıabınskiden jańa kelgen betim bolatyn. Jattyǵýǵa birden sińip kete almadym. Sparrıngtiń bir raýndy 4 mınýttan, al úzilis 30 sekýndtan ǵana boldy. Jurttyń aıtyp júrgeni tek tórtinshi raýndta ǵana oryn aldy», – dedi Kovalev.