Elbasy: Izraıl – elimizdiń mańyzdy ekonomıkalyq seriktesi

Izraıl Qazaqstannyń mańyzdy ekonomıkalyq seriktesi bolyp qala beredi. Bul jaıynda búgin Aqordada Izraıl Premer-mınıstri Bınıamın Netanıahýmen keńeıtilgen quramdaǵy kelissózderden keıingi birlesken málimdeme barysynda QR Prezıdenti Nursultan Nazarbaev aıtty, dep habarlaıdy QazAqparat. «Qos eldiń arasynda erekshe qarym-qatynastyń ornaýy tosynnan emes. Buǵan Qazaqstannan shyqqan ondaǵan myń ızraıldikter septigin tıgizip jatyr. Soǵys kezinde bizge jer aýdarylyp kelip, qazaq halqyn panalady. Otandaryna qaıta oralǵannan keıin de baýyrmaldyq qarym-qatynasty saqtady. Men Tel-Avıvke barǵanymda týǵanyndaı qarsy alady. Olar búginde dostyqtyń altyn kópiri bolyp, yntymaqtastyǵymyzǵa septigin tıgizip otyr», – dedi Elbasy. Qazaqstan Prezıdenti Izraıl Premer-mınıstrimen ótken shaǵyn jáne keńeıtilgen quramdaǵy kelissózderdiń qorytyndysyna kóńili tolatyndyǵyn da basa aıtty. «Qazir ǵana Bınıamın Netanıahý myrzamen kelissózder aıaqtaldy. Ol ashyq ári senimge toly ótti. Biz ekijaqty ózara is-qımyldyń, halyqaralyq kún tártibiniń, lańkestikpen kúrestiń jáne ózge de jaıttardyń keshendi máselelerin talqylap, ózekti máselelerge qatysty pikir almastyq», – dep atap ótti Nazarbaev.