Hokkeı korty keremet!

Sońǵy bes jylda ERG Eýrazııalyq toby men oblys ákimdigi arasyndaǵy áleýmettik jobalardy júzege asyrýdaǵy ózara memorandým aıasynda óńirdegi sporttyń damýyna 10 mlrd teńge ınvestısııalanypty. Jýyrda Aqsý qalasynda alyp óndiris pen jergilikti bıliktiń birlesken memorandýmy barysynda sport kesheni ashyldy. Buǵan deıin ERG Eýrazııalyq toby óz qarajatyna Aqsýda Imanjúsip Qutpanuly atyndaǵy sport saraıyn turǵyzyp, turǵyndardy bir qýantqan edi. Al ekinshi syılaǵan qýanyshtary – jańa paıdalanýǵa berilgen jabyq hokkeı korty. Eýrazııalyq top sport kesheniniń qurylysyna 70 mıllıon teńge bólipti. Muz arenasy 1,5 myń sharshy metrdi quraıdy. Qys mezgilinde muz aıdynynda qala turǵyndary otbasymen kelip, konkı teýip, demalady. Jazda jasan­dy jabyndyda sondaı-aq, bala­­lar jáne jeńil atletıkamen aınaly­sa­tyn múmkindigi shekteýli jandar jattyǵady. Keshende muz aıdy­n­y­nan basqa, hokkeıshiler bólme­leri, jattyqtyrýshylar men dárigerlerge arnalǵan kabınetter bar, ystyq jáne sýyq sý, jylý júıesi iske qosyl­ǵan. Túrli zamanaýı jattyǵý quryl­ǵy­lary, alańdar oryn tepken. – Qalamyzda osyndaı tamasha hok­keı kortynyń ashylýy óte qýa­nyshty, – deıdi ferroqorytpa zaýyty­nyń dırektory Sergeı Prokopev. – Endi úzilmes hokkeı dástúrin jalǵas­tyrýǵa múmkindik mol. Sport jastar, balalar úshin, úlkender úshin qashanda qajet. Aıtsa aıtqandaı, Rıo Olımpıa­dasyna qatysqan erkin kúresten halyqaralyq dárejedegi sport sheberi Dáýlet Shabanbaı aqsýlyq. Bıyl «Dostyq» stadıonynda tamyz aıynda Táýelsizdiktiń 25 jyldyǵy qarsańynda elimizdiń ken-metallýrgııa ónerkásipteri sportshylary arasynda HVIII spartakıada ótti. Oǵan 7 alyp kásip­oryn qatysyp, 500-den asa sport­shy­lar, qonaqtar keldi. Jarys fýtbol, úst­el tennısi, shahmat, voleıbol, bas­ket­bol sekildi birqatar sporttyń túr­leri­nen ótti. Nátıjesinde, Aqsý fer­ro­­­qorytpa zaýytynyń sportshylar ko­man­dasy birinshi oryndy jeńip aldy. Al sport kesheni ashylǵan kúni Táýel­­­siz­diktiń 25 jyldyǵy qurmetine oraı hok­­keıshi balalar komandasyna quny 1 mıllıon teńge turatyn shaı­­­ba­­ly hokkeı sertıfıkaty tabys etildi. Farıda BYQAI, «Egemen Qazaqstan» Pavlodar oblysy, Aqsý qalasy