«Bolashaqqa hat» – urpaqqa amanat

Elordada Din isteri jáne azamattyq qoǵam mınıstrligi Qazaqstan stýdentter alıansymen birlesip, Ulttyq murajaıǵa saqtaýǵa beriletin «Qazaqstan Respýblıkasy Táýelsizdiginiń 50 jyldyǵyna oraı «Máńgilik el» – Bolashaǵy Birtutas Eldiń jas urpaqqa arnalǵan «Bolashaqqa hat» quty-kapsýlasyn saltanatty túrde tabystaý rásimi boldy. Ulttyq murajaıdyń Táýelsizdik zalynda ótken sharaǵa Din isteri jáne azamattyq qoǵam mınıstrligi men Ulttyq murajaı ókilderi, belsendi jastar men jas­tar uıymdary músheleri qatysty. Jınalǵan kópshilik aldyna orkestrdiń súıemeldeýimen Memlekettik tý tórge shyǵaryldy. Artynan Ánuran shyrqalǵannan keıin birqatar adamǵa sóz berildi. Aldymen ortaǵa shyqqan Din isteri jáne azamattyq qoǵam mınıstrligi Jastar isi komıtetiniń tóraǵasy Ǵabıdolla Ospanqulov bylaı dedi: «Búgin jastar aıtýly merekeden tys qalmady. Elimizdiń bar­lyq óńirinen jastar uıymdary Táýelsizdiktiń 25 jyldyǵy qarsańynda ózderiniń bolashaqqa degen usynymdary men tilekterin hatqa jazdy. Endi bul hat Táýelsizdigimizdiń 50 jyldyǵynda ashylady dep úmittenemiz». Jáne ol sol 2041 jyly eńbek etetin, oqıtyn, sportpen shuǵyldanatyn jáne de mádenıette júrgen jastar keshegi óz qatarlastarynyń hatyn oqıtynyn erekshe atady. «Osylaısha jıyrma bes jyl burynǵy jastardyń usynys-tilekterin bilip, ony ári qaraı da damytyp, táýelsizdigimizdi baıandy ete beremiz ǵoı dep senemiz. Hatqa jazylǵan tilekterdiń barlyǵy oryndala bersin. Bizdiń bolashaǵymyz árqashanda jarqyn bola bersin!» – dep qorytty sózin Ǵabıdolla Abdollauly. Sondaı-aq, jınalǵan kópshilik aldynda Ulttyq murajaı dırektory Darhan Myńbaı sóz sóılep, búgingi kún tarıhta qalatyn erekshe kún ekendigine toqtaldy. «Táýelsizdiktiń 25 jyldyǵy degen – shırek ǵasyr ýaqyt. Bul – úlken meje. Endi 25 jyldan keıin eldi qandaı etip elestete alamyz? Elbasy 25 jylda istegen sharýalardyń barlyǵy da áli talaı taldanady, sol arqyly tarıh jazylady deıdi. Al Táýelsizdigimizdiń 50 jyldyǵynda jastarymyz taǵy da qandaı jetistikterge jetedi? Solarǵa kóptegen mindetter júktelip otyr. Olar mindet qana emes, amanat retinde usynylǵan bizdiń kóptegen eldiń aldynda turǵan qadaý-qadaý arman», – dedi Darhan Qamzabekuly. Ulttyq murajaı dırektory, kelesi kezekte, «Bo­lashaqqa hat» dep atalatyn amanatty Ulttyq mu­ra­jaıda saqtaý ıdeıasy óziniń sımvoldyq máni bar eken­digine toqtaldy. «Ulttyq murajaı – ulttyń bar­lyq múddeleri men amanaty saqtalatyn jer. Bizdiń ur­paq bizden góri bilimdi, básekege qabiletti bolýy kerek. Elimizdegi tynyshtyq pen bereke  salmaqty saıasattyń arqasy. Jalpy, elimizdegi barlyq ıgilikti is­terdiń basy-qasynda júrgen Elbasymyzdyń ja­sa­­ǵan málimdemeleriniń barlyǵy da jastarǵa, qazaq­stan­dyqtarǵa jol kórsetip otyr. Sol joldan aınymaı júreıik, ol – Qazaqstan joly», – dedi Ulttyq murajaı dırektory. Táýelsizdigimizdiń 25 jyldyǵyna arnalǵan «Bo­la­shaq­qa hat» amanatyn kelesi býyn jastar 2041 jyly ashyp oqýy tıis. Sóıtip, olar shırek ǵasyrda mańyzdy is-sharalar atqarylǵanynan, elimiz damýynda jetken jetistikterden, Elbasynyń salıqaly saıasatynan habardar bolmaq. Asqar TURAPBAIULY, «Egemen Qazaqstan»