Úrimjide qazaqstandyq stýdentter Táýelsizdikke arnap konsert ótkizdi

Qytaıdaǵy qazaqstandyq stýdentter qaýymdastyǵynyń jastary (KSAC) Úrimji qalasynda Táýelsizdiktiń 25 jyldyǵyna arnap merekelik konsert ótkizdi, dep habarlaıdy QazAqparat. Shara 16 jeltoqsan kúni Úrimshi qalasynda QR SIM Pasport-vıza qyzmetiniń qoldaýymen ótti. Onyń basshysy Marǵulan Kúzekbaev QHR-daǵy QR Elshisi Shahrat Nuryshevtyń atynan merekege jınalǵan 200-den astam qonaqty quttyqtap, oqýda tabys tiledi. Konserttik baǵdarlamaǵa Nurqanat Rahmetov («Kók týdyń jelbiregeni» áni), Shyńjań qarjy-ekonomıkalyq ýnıversıtetiniń stýdentteri («Qamajaı» bıi), Aınar Shaımardanova («Qazaq jastarynyń urany» áni), Shyńjań memlekettik ýnıversıtetiniń stýdenti Abzal Omarov (dombyramen popýrrı), Áıgerim Qalıbaeva men Aıda Begimbet (ıspan bıi), Danııar Ábitaev («Otan-Ana» áni), Jadyra Ernar («Týǵan jer» áni) qatysty jáne KSAC ókilderi birigip «Qazaqstanym» ánin oryndady. Sonymen birge, konsert barysynda kórermenderge Qazaqstan týraly beınerolık kórsetilip, merekelik tort tartý etildi.