Jambyl oblysynda qazaq kúresi federasııasynyń kýbogy ótedi

QR qazaq kúresi federasııasy sporttyq jekpe-jek jáne kúsh qoldanylatyn sport túrleri konfederasııasy men Jambyl oblysy ákimdiginiń qoldaýymen 21 jeltoqsan kúni Taraz qalasyndaǵy «Taraz-Arena» sport saraıynda Álıhan Bókeıhanovtyń 150 jyldyq mereıtoıyna oraılastyrylǵan klýbtyq komandalar arasyndaǵy Qazaqstan Respýblıkasy qazaq kúresi federasııasynyń kýbogy ótedi. Federasııa kýbogyna elimiz boıynsha toǵyz klýbtyq komanda qatysady. Olardyń qatarynda qazaq kúresinen mamandandyrylǵan memlekettik jáne jeke sport klýbtary bar. Bekitilgen reglament boıynsha jarysqa 18 jasqa tolǵan balýandar 55, 60, 66, 74, 82, 90, 100 kelige deıingi jáne 100 keliden joǵary salmaq dárejeleri boıynsha klýb sapynda qatysa alady. Týrnır «betpe-bet» olımpıadalyq shemasy boıynsha ótedi. Kýboktyń jalpy júlde qory 20 mıllıon teńgeni quraıdy. Birinshi oryn alǵan komanda 10  000 000 (on mıllıon), ekinshi oryn 6 000 000 (alty mıllıon), úshinshi oryn  4 000 000 (tórt  mıllıon) teńgege ıe bolady. Bul elimiz boıynsha júlde qorynyń qomaqtylyǵy jaǵynan alǵashqy úshtikke kiretin joba bolyp esepteledi. Klýbtyq komandalar arasynda ótetin týrnırde «Qazaqstan Barysy» men «Eýrazııa Barysy» týrnıri arqyly kópshilikke keńinen tanymal balýandar óz aımaǵynyń namysyn qorǵaıdy.