El ıgiligine – tórt nysan

Táýelsizdik táý eter tuǵyrymyz ekeni aıdaı shyndyq. Sondyqtan bul kúnge árkimniń taralǵyly tartýmen kelýge yqylasty ekeni sózsiz. О́ńirde osy bir qasterli de qasıetti kúni kóptegen ıgi sharalar júzege asty. Sonyń biri de biregeıi «Meıirim» jastardy áleýmettik beıimdeý ortalyǵynyń ashylýy der edik. – Memleket basshysy Nursultan Nazarbaev bizge ár balanyń quqyq­taryn qorǵaýdy qamtamasyz etý mindetin qoıdy. Búginde elimizde ata-anasynyń qamqorlyǵynsyz qalǵan 3 myńnan astam jas turady. Jyl saıyn olarǵa memlekettik turǵyn úı qorynan 50-60 páter bólinedi. Turǵyn úımen qamtamasyz etýdi arttyrý  úshin óńirde jetim balalardy memleket tarapynan áleýmettik qoldaıtyn keshendi baǵdarlama qabyldandy, – dedi oblys ákimi Berdibek Saparbaev. О́ńir basshysynyń bastamasymen júzege asyrylǵan áleýmettik jobaǵa «Sábı» qaıyrymdylyq qory 4 mıllıard teńge qarjy bóldi. Mańyzdy nysannyń ashylýyna qordyń quryltaıshysy, Qazaqstanǵa belgili mesenat Keńes Raqyshev arnaıy keldi. О́ńir basshysy  «Sábı» qaıyrymdylyq qory men Keńes Raqyshevqa osyndaı aýqymdy jáne mańyzdy jobany júzege asyrǵandary úshin alǵysyn bildirdi. О́z kezeginde Keńes Raqyshev aldaǵy kóktem aıynda ortalyqtyń aýmaǵy tolyqtaı abattandyrylyp, sport alańdarymen jab­dyqtalatynyn jetkizdi.  «Meıirim» jas­tardy áleýmettik beıimdeý orta­lyǵynda ata-anasynyń qamqor­ly­ǵynsyz qalǵan  80 jastyń árqaı­sysy jeke páterge ıe bolady. Mundaı jaǵdaı Aqtóbe qalasynda jumys jasap turǵan Jasóspirimder úıinde de múmkin bolmaǵan  edi. Bir páterdiń jalpy aýmaǵy 40 sharshy metrdi quraıdy. Jaıly baspana qajetti kommýnıkasııamen jáne jıhazdarmen jabdyqtalǵan. Jasóspirimder úıimen sa­lystyrǵanda jastar munda 23 jasqa deıin emes, 29 jasqa deıin tura alady. Osy ýaqyt aralyǵynda Turǵyn úı qurylys jınaq banki arqyly óz baspanalaryn satyp alý úshin jetkilikti qarajat jınaýlaryna mol múmkindik bar. Áleýmettik úıde damý múmkindigi shekteýli balalarǵa arnalǵan arnaıy mektep-ınternattardyń túlek­teri de turatyndyqtan, turǵyn úı ǵımaratynyń janynan olarǵa eń­bek etip, jalaqy alýǵa múmkindik beretin shaǵyn sehtar salynǵan.  Qazirgi tańda shashtaraz, aıaq kıim jóndeý jáne kıim tigý sehtary jańa jumysshylardy qabyldaýǵa daıyn. Áleýmettik úı  tirek-qımyl apparatynyń buzylýyn retteıtin jattyǵý qurylǵylary bar emdik deneshynyqtyrý zalymen qamtylǵan. Táýelsizdik kúni shahardyń «Batys» shaǵyn aýdanynda «Qulager» memlekettik balabaqshasy da óz esigin aıqara ashty. Aýmaǵy 5,2 myńnan astam sharshy metr bolatyn eki qabatty ǵımaratqa 320 búldirshin baratyn bolady. Aıta ketý kerek, 320 oryndyq mektepke deıingi mekeme «Nurly jol» baǵdarlamasy boıynsha ashyl­ǵan 33-shi balabaqsha. Ony salýǵa 433 mıllıon  teńge bólingen. О́ńir basshysy kóliktik-logıstı­kalyq ortalyqtyń ashylýyna da qatysty. Kóliktik-logıstıkalyq orta­lyqtyń basty artyqshylyǵy onyń, ásirese, jahandaný jaǵdaı­yn­da mańyzy artqan qolaıly eko­no­mıkalyq-geografııalyq jaǵ­daıymen baılanystyrylady. Nysanda taýardy tıep, túsiretin temir jol toraby bar. Ortalyq  jylyna 70 583 tonnaǵa deıin júk qabyldap, óńdemek. «Bıznestiń jol kartasy-2020» biryńǵaı baǵdarlamasy aıasynda «Bekturova J.A» jeke kásipkerligine ortalyq qurylysy úshin paıyzdyq mólsherleme men sýbsıdııalaý túrinde  550 mıllıon teńge jáne qural-jabdyqtar satyp alýǵa 2070 mıllıon teńge kóleminde kómek kórsetildi. Táýelsizdik kúni aýmaǵy 16 000 sharshy metrdi quraıtyn «Sheber» gıpermarketi de ashyldy. Atalǵan jobany qarjylandyrýǵa 2,5 mıllıard teńge bólinip, 260 jumys orny ashylǵan. Jobany júzege asyrý barysynda memlekettik qoldaý aıasynda quny 630 mıllıon teńge bolatyn qural-jabdyqtardy satyp alyp, aınalymdaǵy qarjyny toltyrý úshin nesıeniń paıyzdyq mólsherlemesin sýbsıdııalaý boıynsha jaǵdaılar jasaldy. Satybaldy SÁÝIRBAI, «Egemen Qazaqstan» AQTО́BE Sýretti túsirgen Haıreden RAÝShANOV