Saǵadıev Qaraǵandy MTÝ ujymyn jańa rektormen tanystyrdy

QR Bilim jáne ǵylym mınıstri Erlan Saǵadıev kenshiler qalasyna arnaıy kelip, Qaraǵandy memlekettik tehnıkalyq ýnıversıtetiniń ujymyn jańa rektor – belgili ǵalym, professor, tehnıka ǵylymdarynyń doktory Marat Ibatovpen tanystyrdy. Taıaýda Astanada Memlekettik joǵary oqý oryndarynyń basshylyǵyna kandıdattardy anyqtaý jónindegi respýblıkalyq konkýrstyq komıssııanyń otyrysy ótken bolatyn. Respýblıkalyq konkýrstyq komıssııa, áńgimelesý men joǵary oqý ornyn damytý jónindegi usynylǵan baǵdarlamany talqylaý nátıjesinde, Qaraǵandy memlekettik tehnıkalyq ýnıversıtetiniń rektory laýazymyna Marat Keńesuly Ibatovty taǵaıyndaýdy usyndy. Rektor jańa talaptarǵa sáıkes, naqtyraq aıtqanda, ashyq konkýrs ádisimen saılandy. Burynǵy jyldary memlekettik joǵary oqý oryndarynyń rektorlary QR Bilim jáne ǵylym mınıstri taǵaıyndaıtyn. Jáne oqý oryndarynyń basshylary óz qyzmetterin eki jáne odan da kóp merzimnen basqaryp keldi. Buryn da habarlanǵandaı, atalǵan qyzmetke taǵaıyndaýdyń jańa joly basqarýdaǵy derbestikti jetildirý men bilim sapasyn arttyrý, sonymen qatar olardyń qoǵam aldyndaǵy jaýapkershiligin kúsheıtý maqsatyn kózdeıdi. M. Ibatov QarMTÝ úshin óz adamy: ol buryn osy ýnıversıtette fakýltet dekany, oqý isi jónindegi prorektor, birinshi prorektor qyzmetterin atqarǵan. Sońǵy tórt jylda Temirtaý qalasynda ornalasqan Qaraǵandy memlekettik ındýstrıaldyq ýnıversıtetiniń rektory boldy. QR Prezıdenti Nursultan Nazarbaev bastaǵan tulǵalar bilim alǵan áıgili ýnıversıtetti bilikti ǵalym, tájirıbeli basshy M. Ibatov jańa bıikterge kóteredi degen senim mol. Esterińizge sala ketsek, buǵan deıin Qazaqstanda úsh memlekettik JOO-nyń rektory tańdalǵanyn habarlaǵan bolatynbyz.  Qaırat Ábildınov, "Egemen Qazaqstan".