О́mirdiń ózi jańalyq

«Habar 24» arnasy – táýligine jıyrma tórt saǵat aqparat taratatyn Qazaqstandaǵy tuńǵysh jáne biregeı arna. Jańa maýsymda telearnada rebrendıng júrgizilgen bolatyn. Bul ózgerister arnaǵa qalaı áser etti jáne bolashaqtaǵy josparlary jóninde tolyǵyraq bilý úshin arna basshysy Arman SEIITMAMYTPEN áńgimelesken edik. – Arman Baltabaıuly, «Habar 24» arnasynyń qurylǵanyna 4 jyl boldy. Osy ýaqyt aralyǵynda arnanyń óz aýdıtorııasy qalyp­tasyp úlgerdi me? Qalaı oılaısyz? – 4 jyl kóp ýaqyt emes, degenmen tolyǵymen qalyptasyp úlgerdi. Bizdiń ujym osy maqsatta tańnyń atysynan, kúnniń batysyna deıin qyzmet etip, táýligine jıyrma tórt saǵat boıy elimizdegi jáne shet memleketterdegi jańalyqty birinshi bolyp jetkizip júr. Arnada telehıkaıa, kıno nemese konserttik jobalar kórsetilmeıdi, tek aqparattyq-tanymdyq habarlardy jáne jańalyqtardy usynamyz. Olardyń barlyǵy júz paıyz otandyq ónim. Sonymen qatar tilshilerdiń aldyna qoıylatyn mindet – jańalyqtardyń shynaıylyǵy men jedeldigi. Aqparat tekserilgen, eshqandaı boıaýsyz, eki jaqtyń da pikiri bar, jýrnalıstiń jeke oıynsyz beriledi. Munyń bári materıaldyń qundy, senimdi, dáıekti bolýyna alyp keledi. Sondyqtan, kórermen bizdiń arnadaǵy jańalyqtyń shyndyqqa negizdelgenine esh kúmán­dan­basa bolady. Jalpy bizdi kóre­tin­der saıasattan habary bar, qoǵam ómirine belsene aralasatyn, joǵary bilimdi adamdar. – Joǵaryda aıtyp ketkeni­ńiz­deı, sizderde oıyn-saýyqtyq baǵdar­la­ma­lar joq. Efırdegi jobalardyń barlyǵy ekonomıka, bıznes, týrızm syndy salalarǵa arnalǵan. Mundaı habarlarǵa kórermen tarapynan suranys bar ma? – Qazir telearnalarda «reıtıng» degen túsinik bar. Kóptegen arnalar joǵary reıtıng úshin talasyp, sany bar, sapasy joq jobalardyń sanyn kóbeıtti. Al, biz reıtıng úshin qyzmet etpeımiz, jasap jatqan dúnıelerimiz de reıtıngpen ólshenbeıdi, bas­tysy – kórermenge sapaly materıal usyný. Aýdıtorııanyń pikirin eske­re otyryp, jedel ári qyzyqty jańa­lyqtar kórsetip kelemiz. Qa­zir­gi tań­da «Habar 24» telearnasyn búkil qazaq­standyqtar tamashalaı­dy, 8 mıllıonnan astam adam saıt qol­da­nýshysy, 60 mıllıonnan as­tam adam «YouTube» jelisindegi paraq­sha­myzǵa kirgen. Tipti, jaqynda ǵana res­pýb­lıkalyq buqaralyq aqparat qu­ral­darynyń basshylarymen kezdes­ken Elbasymyzdyń ózi: «Habar 24» arna­syn kóremin, óte jaqsy kanal. Aq­paratty shynaıy túrde berip otyr» dep, arnamyzǵa oń baǵasyn berdi. Munan artyq ne baǵa kerek?! Bul bizdiń durys baǵytta kele jatqanymyzdyń kórsetkishi. Sonymen birge, bizdiń Strategııalyq damý departamentiniń qyzmetkerleri «Habar 24-ke» qatysty saýalnama júr­gi­zip jatyr. «Bizdiń arnamyzdan qan­daı baǵdarlama kórgińiz keledi?», «Qandaı taqyryptar qozǵalýy kerek?» jáne «Arna júrgizýshileri usyn­ǵan jańalyqtarǵa senesiz be?» degen sııaqty suraqtardyń jaýaby daıyn­dalyp, nátıjeleri shyqqan soń sarapta­ma jasalady, bolashaqta sol baǵytta jumys isteımiz. – Osy maýsymda rebrendıng júr­gizildi. Arnanyń kontenti­n­de ózge­ris bar ma? Jańa baǵdar­la­ma­lar­ǵa toqtalyp ketseńiz.... – «Habar 24» alǵashqy kúnnen bas­tap táýlik boıy jańalyqtar tara­tatyn arna retinde quryldy. Maq­­satymyz – aqparatty birinshi bolyp jetkizý. Sondyqtan, bul jyly da kóp ózgeris bolǵan joq. Joǵary­da aıtqa­nym­daı, buǵan deıin jańalyq­tar­dy qa­laı berdik, solaı berip júrmiz. Shynshyldyq, jedeldik, ádildik – bul bizdiń basty talap. Jańa maýsymda tikeleı kórsetilimderdiń sany artty. Osy jyly biz 354 ret tikeleı qosylym uıymdastyryp, jańalyqtarǵa 29 460 sıýjet ázirledik. Ortalyq kommýnıkasııalar qyzmetinde ótetin memlekettik mańyzy bar is-shara bizdiń arnanyń tikeleı efıri arqyly kórsetiledi. Máse­len, respýblıkamyzdyń barlyq oblys­tarynyń ákimderiniń esebin, mınıstr­ler men Úkimet otyrys­tary­nyń qorytyndysyn kórermen dál biz­diń arna arqyly kórdi. Tehnıkalyq múm­­kindikterimiz jaqsaryp, ónim­derimiz­­diń sapasy arta tústi. Kórer­men­ge máde­nıet, sport, týrızm jáne eko­no­mıka salalaryna qatysty paıdaly aqparat berip kelemiz. Joba­lar­dy daıyndaıtyn prodakshn kom­panııalarǵa qoıylatyn talap­tar ózgerdi. Buryn aqparattyq-tanym­dyq habarlarǵa tapsyrys bersek, qazir aqparattyq-saraptamalyq baǵ­dar­­lamalardy talap etýdemiz. My­sal úshin aıtsaq, «Bastaý kerek» baǵdar­lamasy qosyldy. Kishigirim tok-shoý janryndaǵy jobaǵa ártúrli keıip­ker­ler kelip, óz basyndaǵy kúrdeli máse­lelerimen bólisedi. Stýdııaǵa sol máse­lege qatysy bar sala mamandary shaqyrylyp, túıinniń túıtkilin sheshýge tyrysamyz. Sonymen birge «Draıv» jobasyn usyndyq. Qazirgi zamanda erler bolsyn, áıelder bolsyn kólikke óte qatty qyzyǵady. Son­dyqtan avtokólik jaıynda arnaıy baǵdarlama ashýdy jón kórdik. Jańa habardyń avtorlary elimizde jáne búkil álemde shyǵarylyp jatqan avtokólik óndirisiniń jańalyqtary men damý barysy týraly sóz etedi. Bul otandyq jáne sheteldik kólikter týraly shynaıy jáne kásibı turǵydan jasalǵan sholý. Mádenı jańalyqtardy izdegen adamdar úshin «Mádenıetke saıa­hat» degen habar ashtyq. Uly Dala­nyń mádenı ómiri jandanyp tur. Sonaý yqylym zamannan bastap, kúni búginge deıin elimizdiń barlyq óńir­lerinde án, bı, kórmeler, san alýan qoıylymdar, konserttik sharalar jıi-jıi uıymdastyrylady, sonyń bári jańalyq. Biz kóp ulttyń basyn biriktirip, bir arnaǵa toǵystyrǵan, yntymaǵy men birligi jarasqan memleketpiz. Sol ulttardyń mádenıeti men dástúrin, búgingi jaǵdaıy týraly beıneleıtin «Shańyraq» atty jańa joba jaryqqa shyqty. Sonymen qatar, «Olımp», «Saıahat», «Zań jobasy», «Haıtek» syn­­dy kóptegen habarlar bar. Degen­men, taǵy qaıtalaǵym keledi, biz – jańa­lyqtar arnasymyz. «О́mirdiń ózi­ jańalyq» degen urandy ustanǵan arna retinde biz úshin birinshi kezekte – jańalyqtar! – VVS qyzmetkerleri «Bir saǵat­qa­ keshikken jańalyq jańa­lyq emes», – deıdi. Al sizdiń jýrnalıster qan­daı ustanym boıynsha jumys isteı­di? – Elbasy aıtqandaı, «Habar 24» –  elimizdiń basty aqparattyq arnasy. Al, aqparat degenimiz ne? ol – materıaldy der kezinde berý, biraq tolyqqandy, shynaıy etip usyný. Jańalyqtarda eshqashan jalǵan sóıleýge bolmaıdy. Birinshiden, tekserilmegen málimet berip, kórermen seniminen aıyrylasyń. Ekinshiden, «Aıtylǵan sóz atylǵan oqpen teń» degen ata-babamyz. biz mem­lekettik máseleler tóńireginde sóz qozǵaǵandyqtan, árbir sózge jaýap­kershilikpen kelemiz. Oqıǵa qaıda, qashan jáne qalaı boldy, adam shyǵyny bar ma degen sııaqty máselelerdi naqty anyqtaǵan soń ǵana, efırge berilýi tıis. Aqıqatty anyqtaý ár qalaı bolady, keıde bul bir saǵat ýaqytty alýy múmkin, al keıde resmı organdardan jaýap kútip qalamyz. Aıtyp ketkendeı, tikeleı efır sany artty. Oqıǵa ornyna tilshimiz baryp, birden halyqpen baılanysqa shyǵady. Odan artyq, odan tez jumys isteý múmkin emes sııaqty. Sondyqtan bizdiń ustanym jyldamdyqpen qatar shynaıylyq deý­ge bolady. – Zaman talabyna saı adamdar jańalyqtardyń barlyǵyn áleý­met­tik jeliler arqyly oqyp, qarap júr. Sizder de bul jaǵy eskerilýde me? – Árıne, ol jaǵyn da eskerdik. Biz­diń arnanyń resmı saıty bar – «24.kz». Ol efırdiń aınasy sııaqty, teledıdarǵa shyqqan kontenttiń bar­lyǵy sol jerde saqtaýly. Onyń ústine efırge shyǵa bermeıtin keıbir eksklıý­zıvti materıaldardy saıttan qaraýǵa bolady. Eń bastysy «Habar 24» saıty qoldanýǵa ońaı, jańa­lyqtardy izdeý barysy jeńil, oqyr­man úshin yńǵaıly etip jasalǵan. Son­daı-aq barlyq áleýmettik jeliler­de paraqshalarymyz bar, mobıldi qosymshamyz da jumys isteıdi. – Arnanyń jumysy, kontenti tý­raly tolyq bildik. Taǵy qandaı maqtanyshtaryńyz bar? – Qazaqstannyń barlyq aımaq­ta­ryn­da arnaıy tilshiler qosyny jumys isteı­di. Olar kez kelgen ýaqytta tike­leı efırge shyǵýǵa múmkindik beretin jyl­jymaly televızııalyq stansalar­men qamtylǵan. Sonymen birge, Qytaı, Reseı, Ońtústik Koreıa, Túrkııa, AQSh jáne Eýropa memleketterinde 8 resmı tilshimiz jáne 5 frılanserimiz bar. Kelesi jyly qosymsha 6 frılan­sermen jumys isteýdi josparlap otyr­myz. Muny maqtanyshpen aıta ala­myn. Jýrnalısterimiz óz isteriniń she­beri, shama-sharqy kelgenshe jaqsy jumys istep jatyr, bergen tapsyrmany durys oryndap keledi. – Áńgimeńizge rahmet. Áńgimelesken Gúlnur О́TJANQYZY