Ulttyq bank «Qazkommersbankke» qaryz berdi

QR Ulttyq banki «Qazkommersbank» AQ-ǵa qysqa merzimdi ýaqytqa 400,8 mlrd. teńge kóleminde zaem berdi. Bul týraly QR Ulttyq Bankiniń baspasóz qyzmeti habarlady. «Ulttyq Bank basqarmasy osyǵan deıin «Qazkommersbank» AQ-ǵa banktiń júıelik mańyzdylyǵyn eskere otyryp, 400,8 mlrd teńge somasynda qysqamerzimdi qarjylandyrý berý týraly sheshim qabyldaǵan bolatyn. Qaryz bank klıentteriniń aldyndaǵy mindettemelerdi oryndaý úshin ótimdiliktiń qosymsha qoryn qamtamasyz etý maqsatynda berildi. Búgingi kúni bank ótimdi aktıvterdiń jetkilikti kólemine ıe. Bul oǵan qaryzdy ishinara merziminen buryn óteýge múmkindik berdi. «Qazkommersbank» AQ Ulttyq Bankke buryn bólingen qarajattyń jartysyn qaıtardy», - delingen QR Ulttyq banki taratqan habarlamada. Sondaı-aq, Ulttyq bankten atap ótkendeı, qazirgi ýaqytta bankterdi kapıtaldandyrýdy ulǵaıtý bank sektorynyń básekege qabilettiligin arttyrýdyń basym baǵyttarynyń biri bolyp esepteledi. Osyǵan baılanysty, Ulttyq Bank aǵymdaǵy qadaǵalaý prosesi sheńberinde aksıonerlermen, onyń ishinde «Qazkommersbank» AQ-nyń aksıonerlerimen kapıtaldandyrý deńgeıin arttyrý jóninde kelissózder júrgizýde.