Alloteı: Men Qanat Islamdy nokaýtqa túsiremin

WBO Intercontinental belbeýi úshin bolǵan jekpe-jekte qazaqstandyq Qanat Islamnan (22-0, 18 KO) jeńilip qalǵan ganalyq boksshy Patrık Alloteı (35-3, 28 KO) qazaqstandyqpen taǵy da judyryqtasqysy keletinin aıtty, dep habarlady Vesti.kz. Boksshynyń aıtýynsha, ol tóreshiler durys sheshim shyǵarmady dep esepteıdi eken. "Men sońǵy jekpe-jekte upaı sany boıynsha jeńdim (Ganada judyryqtasqan otandasy Djordjıo Amızýdy aıtyp otyr). Amızýmen jekpe-jek ońaı bolǵan joq. Ony nokaýtqa túsirgim keldi, biraq munda bastysy jekpe-jekti baqylaýda ustaýym kerek boldy. Ádis boıynsha jekpe-jek sátti boldy", - dedi Alloteı. Sonymen qatar, boksshy álem chempıony bolýdy maqsat tutatynyn aıtty. "Kelesi jekpe-jegimniń qashan ótetinin bilmeımin, sebebi meniń promoýterim joq", - deıdi ol. Suhbat barysynda ganalyq boksshy Qanat Islammen taǵy da judyryqtasqysy keletinin aıtty. "Taǵatsyzdana kútip júrmin. Sebebi tóreshiler durys sheshim shyǵarmady. Bul jekpe-jekte jeńiske jetkenimdi bilemin. Revansh bolsa, myqtyraq ekenimdi dáleldeımin. Múmkindik berińizder, sonda men Islamdy nokaýtqa túsiremin", - dep málimdedi ol. Al osyǵan deıin Qanat Islamnyń jekpe-jekti nokaýtpen jeńýge jaraqaty kedergi bolǵanyn málimdegen bolatyn. Ganalyq boksshy buǵan qatysty bylaı pikir bildirdi: "Qanat ózin-ózi aldap júr! Qolyn jaraqattap alýyn men májbúrledim. Meniń de eki qolyma zaqym keldi, biraq men bul jaıly eshkimge aıtpadym da. Eger ol meni nokaýtqa túsiremin dep sense, taǵy bir kezdeseıik. Qanat Islamdy qurmetteımin, biraq jekpe-jek Qazaqstanda ótpese, nátıje basqasha bolar edi", dedi ol. Esterińizge sala ketsek, Qanat Islam men Patrık Alloteıdiń jekpe-jegi Almatyda 29 qazanda ótken bolatyn.