Tabys tasqyny tolastamaıdy

El Táýelsizdigi ekonomıkalyq tabystardyń muryndyǵyna  aınaldy. Kórsetkishter kóńildi shalqytady. Osy merzim ishinde Qostanaı oblysynyń óńirlik jalpy ónimi  363 ese ósti, al ony jan basyna shaqqandaǵy kórsetkish burynǵydan 504 ese kóp! Negizgi qarjyǵa qosylǵan ınvestısııalar kólemi búginde  1,6 trıllıon teńgeni quraıdy eken. 25 jyl ishinde Qostanaı oblysy  agrarly-ındýstrııaly óńirge aınaldy. Aýylsharýashylyq ónimderin  óńdeý salasyn qosqanda ónerkásip óndirisiniń kólemi 1991 jyly 10 mıllıon teńge shamasynda bolsa, 2015 jyly 443 mıllıard teńgege jetti. Sońǵy jyldary ken, ıaǵnı shıkizat óndirisin óńdeý salasy qarqyn aldy. О́nerkásip qurylymynda óńdeý sektory 54 paıyzdy quraıdy, ol osydan 10 jyl buryn óndiristiń tórtten biri  ǵana bolatyn. Bul Qazaqstandy ındýstrııalandyrý baǵdarlamasynyń  tamasha nátıjesi ekeni anyq. Sońǵy alty jylda oblysta 125 mıllıard teńgeni quraıtyn 84 ınvestısııalyq joba júzege asty. Sonyń arqasynda 5 myń qostanaılyqqa jańa jumys oryndary usynyldy. Oblysta kásiporyndardyń syrtqy ekonomıkalyq-saýda baılanystarynyń órisi keńeıip keledi. О́ńirde óndirilgen ónimder búginde álemniń 80 memleketine eksporttalady. 2000 jyldan beri munda aýylsharýashylyq tehnıkalary, jeńil, júk mashınalary, sendvıch-panel, karton, ósimdik maıy sekildi ónimniń kóptegen jańa túrleri óndiriledi. Qostanaı oblysy elimizde mashına jasaý ortalyǵyna aınalyp keledi. Búginge deıin mashına jasaý zaýyttarynda 30 myń jeńil avtomobıl sapqa qoıyldy. Aldaǵy ýaqytta da tabys tasqyny tolastamaıdy. Qostanaıda Qazaqstandaǵy alǵashqy elektromobıl qurastyryldy. Qostanaıda qurastyrylǵan JAC elek­tro­mobıliniń 12 danasy aldymyzdaǵy jyly EKSPO-2017 kórmesinde oblystyń brendi retinde kórsetiledi. Qostanaı qalasynan oryn tebetin ındýstrııalyq aımaq ta tabystyń kepili bolaryna senim mol. Názıra JÁRIMBETOVA, «Egemen Qazaqstan» QOSTANAI