Búgin «Egemen Qazaqstan» redaksııasynda basylym basshysy Darhan Qydyráli sońǵy alty aıdyń qorytyndysy boıynsha esep berý jınalysyn ótkizdi. Oǵan gazet ujymymen qatar depýtattar, jazýshylar, ǵalymdar jáne basylymda kóp jyldar qyzmet atqaryp, eńbek demalysyna shyqqan birneshe ardager jýrnalıst qatysty.
Basqarma tóraǵasy Darhan Qydyráli gazet pen gazet saıtynyń sońǵy aılardaǵy jetistikteri, jańalyqtary jaıly baıandady. Mysaly, Aqparat jáne Kommýnıkasııalar mınıstrliginiń qoldaýymen jańa damý strategııasy jasalyp, 1 qyrkúıekten bastap gazet jańa dızaınmen, jańa formatta shyǵa bastady. Gazettiń ishki mazmunynda da aıtarlyqtaı ózgerister boldy. Saraptamalyq materıaldarǵa basymdyq berile bastady. Jańa tujyrymǵa sáıkes jańa bólimder men aıdarlar, jańa better ashyldy. Solardyń ishinde sarapshylar baǵanyn erekshe atap ótýge bolady. Baǵanda sarapshylar, gazet sholýshylary men elge tanymal memleket jáne qoǵam qaıratkerleri salmaqty materıaldaryn jarııalaıdy.
Jaqynda jeke jelilik basylym bolyp tirkelgen Egemen.kz saıty birneshe aıda aqparattyq ınternet-basylymdar ishinde alǵashqy 25-tiń qataryna qosyldy.
Sonymen qatar aldaǵy josparlardyń negizgileri retinde gazetti osy zaman talaptaryna saı ári qaraı jetildirý, saıtty tolyqqandy aqparatty portal retinde jańartý, aqparat máselelerine arnalǵan semınarlar ótkizý, «Egemen» janynan Jýrnalıstıka akademııasyn ashý, Ardagerler keńesin qurý jóninde de aıtyldy.
Jospardaǵy taǵy bir ıgi shara - «Egemen Qazaqstannyń» 100 jyldyǵyna qaraı basylymnyń 1919 jyldan bergi materıaldarynan turatyn 10 tomdyq jınaqtyń shyǵatyny. Ol sońǵy júz jyldyq tarıhymyzdaǵy mańyzdy kezeńder boıynsha tomdarǵa bólinip, ár kezeńniń aınasy bola alatyn materıaldardy jınaqtamaq.
Jıyn barysynda qurmetti qonaqtar da sóılep, izgi tilekterin aıtty. Gazetti kóp jyldar basqarǵan depýtat Saýytbek Ábdirahmanov «Egemen Qazaqstan» basylymy men onyń ınternet-saıtyn jańa sapaǵa kóterý baǵytyndaǵy jumystarǵa joǵary baǵa berdi.
