«Egemen Qazaqstan» gazetiniń janynda ardagerler keńesi jumys isteıtin boldy. Basylym basshysy Darhan Qýandyqulynyń osyndaı usynysyn búgin redaksııasynyń qorytyndy jıynyna qatysqan – el gazeti «Egemende» uzaq jyldar jemisti qyzmet atqarǵan, búginde zeınetke shyqqan aǵa býyn ókilderi bir aýyzdan qoldady.
Gazettiń búgingi ujymymen kezdesken Qoıshyǵara Salǵara, Saýytbek Ábdirahmanov, Tólen Ábdikov, Ádil Dúısenbek, Jumagúl Soltıeva, Janat Elshibek jáne Qaısar Álim syndy qalamy qarymdy ardager jýrnalıster aldaǵy joba-josparlarmen tanysyp, atqarylyp jatqan jumystardy joǵary baǵalady. Redaksııada dástúr sabaqtastyǵy jańashyl úrdistermen sátti jalǵasyn taýyp jatqanyna rızashylyqtaryn bildirdi. Kezdesý sońynda redaksııa tarapynan ardagerlerge syı-sııapat jasaldy.
