Reseı, Túrkııa, Iran Sırııa boıynsha kelissózge daıyndyqty bastady

Reseı, Túrkııa jáne Iran Astanada ótetin Sırııaǵa qatysty kezdesýge ázirlikke kiristi, dep habarlady RF SIM basshysy Sergeı Lavrov Reseı prezıdenti Vladımır Pýtın jáne Qorǵanys mınıstrliginiń basshysy Sergeı Shoıgýmen kezdesýde. Bul týraly RIA Novostı habarlady. «Biz qazir túriktermen, ırandyqtarmen Astanada ótetin kezdesýge daıyndyqqa kirisip jatyrmyz», - dedi Lavrov. Beısenbide Pýtın úsh qujatqa qol qoıǵanyn habarlady: birinshisi - Sırııa úkimeti men qarýly oppozısııa arasynda SAR aýmaǵynda atysty toqtatý týraly: ekinshisi - atysty toqtatý rejimin baqylaý boıynsha sharalar kesheni; úshinshisi - Sırııadaǵy jaǵdaıdy retteý boıynsha beıbit kelisimniń bastalýyna ázirlik týraly málimdeý. Budan buryn Pýtın túrik kóshbasshysy Taıyp Erdoǵanmen Sırııadaǵy soǵysyp jatqan taraptarǵa Astanadaǵy jańa alańda beıbit kelissóz úderisin jalǵastyrýdy usyný týraly ýaǵdalasqanyn habarlaǵan. Onyń aıtýynsha, jańa alań jenevalyq kelissózderdi tolyqtyrady. Qazaqstan Prezıdenti Nursultan Nazarbaev Pýtınmen jáne Erdoǵanmen telefon arqyly sóılesýi barysynda bul bastamany qoldap, Astananyń mundaı kelissóz ótkizý alańyn usynýǵa ázir ekendigin habarlaǵan.