Úndistannyń Goa shtaty qolma-qol aqshadan bas tartady

Úndistannyń týrıstik Goa shtaty qolma-qol aqsha qabyldamaıtyn osy eldiń alǵashqy shtaty bolmaq. Jańa jyldan bastap barlyq tólem uıaly telefon nemese bank kartasy arqyly ǵana júzege asyrylady. Bul týraly shtattyń bas hatshysy Radjesh Kýmar Shrıvastava málimdedi, dep habarlady TASS aqparat agenttigi. «Barlyq tranzaksııany uıaly telefon nemese satyp alýshyǵa tıesili bank esepshoty arqyly júzege asyrýǵa bolady», – dedi Kýmar Shrıvastava. Ol aldaǵy ýaqytta Goa aımaǵynda ámııan ustaýdyń qajeti bolmaıtynyna jáne urylardyń múldem joǵalaryna senim artyp otyr. Kez kelgen taýarǵa, tipti balyq, et, kókónis satyp alý úshin de uıaly telefonnan arnaıy kodty terý kerek. Bankomattar ádettegideı jumys isteýdi jalǵastyra beredi. Dúkender men qonaq úılerde nesıelik kartamen tólem jasaýǵa bolady. Shtat osylaısha «aqshasyz qoǵamǵa» aınalýdy maqsat etip otyr. Úndistan bıligi alaıaqtarǵa qarsy kúres maqsatynda 8 qarasha kúni qoldanystan 500 jáne 1000 rýpııdi (2500-5000 tg) alyp tastaǵan bolatyn. Goa – 1,5 mıllıon halqy bar aımaq. Mundaǵy turǵyndardyń turmystyq jaǵdaıy jaqsy.