Qazaqstanda memleketti basqarýdyń myqty júıesi bar - Sıý Szıan

Búgin «Qazaqstan Respýblıkasynyń Táýelsizdigine 25 jyl: nátıjeler, jetistikter, keleshek kókjıegi» taqyrybyndaǵy xalyqaralyq konferensııada sóz sóılegen QHR Syrtqy ister mınıstrligi janyndaǵy Halyqaralyq qatynastar ınstıtýty basshysynyń orynbasary Sıý Szıan Qazaqstandy «avtorıtarly memleket» dep atap, Qazaqstannyń 25 jyl ishindegi qarqyndy ekonomıkalyq damýyn, sondaı-aq aımaqtaǵy ultaralyq jáne konfessııaaralyq turaqtylyq aımaǵyna aınalǵanyn erekshe atap ótti. «Ishki jalpy ónim 23 esege kóbeıdi. Osynyń arqasynda xalyqtyń ál-aýqaty kóterildi. Sóıtip, Qazaqstan TMD aýmaǵynda ekinshi orynǵa shyqty. Oǵan ne sebep boldy? Árıne, oǵan barlyq faktorlar áser etti. Degenmen, birinshi kezekte memleketti basqarýdyń myqty júıesin erekshe atap ótken jón. Biz ony «avtorıtarly basqarý» deımiz. Alaıda ol sózdiń maǵynasyn jaqsy jaǵynan túsiný kerek. Osynyń bári áleýmettik turaqtylyq pen turaqty ekonomıkalyq damýǵa negiz boldy. Sondyqtan Qazaqstannyń «avtorıtarlyq saıasaty» parlamenttik jáne kóppartııaly demokratııanyń jalpy faktory bolyp sanalady. Mine, osyndaı myqty prezıdenttik júıeniń arqasynda Nursultan Nazarbaev turaqty Qazaqstandy, álem moıyndaǵan memleketti qalyptastyra bildi», - dedi Sıý Szıan. Aıta keteıik, búgingi konferensııaǵa Túrkııa, Reseı, Fınlıandııa, sondaı-aq Eýropalyq odaqtyń ókilderi qatysýda.