Aldaǵy jyly Qazaqstannyń ishki jalpy ónimi ósedi. Bul týraly Astanada ótken «Qazaqstan: jańa ınvestısııalyq múmkindikter» atty konferensııa Eýropa qaıta qurý jáne damý bankiniń Qazaqstandaǵy bólimshesiniń jetekshisi Djanet Hekman aıtty.
«Eýropalyq qaıta qurý jáne damý banki Qazaqstanda barlyq salalardy qarjylandyryp jatyr. Sol sebepti basqa xalyqaralyq uıymdar men donorlyq kompanııalarǵa qaraǵanda, biz osy eldegi jaǵdaıdy jaqsy bilemiz. Búginde biz baspasóz betterinde san alýan boljamdardy oqyp júrmiz. Degenmen, bizdiń ekonomıster bolashaqqa optımıstik kózqaraspen qarap otyr. Bizdińshe, búginde Qazaqstan munaı-gaz salasyndaǵy ekonomıkalyq quldyraý kezeńinen ótti. Memleket atalǵan synaqty sátti eńsere bildi. Sondyqtan bıyl ishki jalpy ónim shamamen 0,7 paıyzǵa ósedi degen boljam bar. Al kelesi jyly ol kórsetkish 2,4 paıyzǵa kóteriledi. Bizdiń esebimizge sáıkes, qazirgi kezde ınflıasııa óziniń sharyqtaý shegine jetti. Endi, aǵymdaǵy jyldyń aıaǵyna deıin, sosyn kelesi aıda aqsha men aktıvterdiń aınalymy qalypty deńgeıge oralady», dedi Djanet Hekman.
Aıtqandaı,«Qazaqstan: jańa ınvestısııalyq múmkindikter» atty konferensııa Investısııalar jáne damý mınıstri Jeńis Qasymbektiń qatysýymen ótti. Shara el Táýelsizdiginiń 25 jyldyǵyna oraı uıymdastyryldy. Konferensııa jumysyna 100 qazaqstandyq jáne agroóndiristik keshen, memlekettik-jekemenshik seriktestik, taý-metallýrgııa kesheni, qýat, munaı-gaz jáne bank sektorlary, aqparattyq-kommýnıkasııalyq tehnologııalar, ınnovasııa, kólik jáne logıstıka, taǵam óndirisi, hımııalyq sala, mashına qurastyrý, keme jasaý, medısına jáne týrızm salasyndaǵy qazaqstandyq jáne sheteldik kompanııalardan 300-ge jýyq adam qatysty.
Memlekettik uıymdardyń ókilderi, sondaı-aq Qazaqstan Respýblıkasyndaǵy shet memleketterdiń dıplomatııalyq ókildikteriniń, sheteldik bıznes-assosıasııalardyń basshylary konferensııaǵa úlken qyzyǵýshylyq tanytty. Sonymen qatar shara aıasynda Qazaqstannyń ındýstrııasyna, ınvestısııalyq qyzmettiń keńeıýi men joǵary tehnologııalyq óndiristiń damýyna qosqan úlesteri úshin sheteldik ınvestorlardy jyl saıynǵy marapattaý rásimi de ótti.
Dınara Bitikova,
"Egemen Qazaqstan".
