Vengrııadan Keıki batyrdyń músinin 12 jeltoqsanda alyp keledi

Keıki batyrdy jerleý sharalary aldaǵy jyldyń qyrkúıegine belgilenip otyr. Bul týraly búgin Mádenıet jáne sport mınıstr Arystanbek Muhamedıuly málimdedi. «12 jeltoqsanda bizge Býdapeshtten Keıki batyrdyń bet álpetiniń músinin alyp keledi. Qazirgi kezde aldyn ala sýretter jiberildi. Batyrdyń ózindik erekshelikteri bar ekenin bilesizder. Úkimet basshysynyń orynbasary basshylyq etip otyrǵan memlekettik komıssııanyń otyrysy ótip, onda aqylǵa salynǵan tıisti sheshim qabyldandy. Oǵan qurmetti tulǵalar qatysty. Atap aıtqanda, barlyq sharalardy qyrkúıekte ótkizý oryndy bolatyndyǵy kelisildi. Biz atalǵan merzimge deıin Keıki batyrǵa monýment salýymyz kerek. О́ıtkeni, qazirgi kezde turǵan eskertkishtiń bıiktigi eki metr ǵana eken», – dedi mınıstr. Budan bólek, DNQ-ny sońyna deıin anyqtaý mindeti turǵanyna toqtalǵan ol, majarlyq ǵalymdar tıisti zertteýler júrgizip jatqanyn jetkizdi. Aıta keteıik, 13 qazan kúni Qazaqstan Respýblıkasy elshiliginiń kómegimen Qazaqstan Respýblıkasynyń Ortalyq memlekettik mýzeıi Býdapesht qalasyna Keıki batyrdyń bas súıegin jetkizgen bolatyn. Vengrııanyń jaratylystaný ǵylymdary mýzeıinde Qazaqstan Respýblıkasynyń Ortalyq memlekettik mýzeıiniń dırektory Nursan Álimbaı Vengrııa mýzeıiniń bas dırektory Zoltan Korshoshqa DNQ saraptamasyn júrgizip, qalpyna keltirý úshin Keıki batyrdyń bas súıegin tapsyrdy. Mýzeıdiń antropologııalyq bólimine jetekshilik etetin Agnesh Kýshtar Keıki batyrdyń bas súıegin qalpyna keltirý jumystaryn óz basshylyǵyna aldy.