Memleket basshysy Amerıka Qurama Shtattarynyń saılanǵan prezıdenti Donald Tramppen telefon arqyly sóılesti dep habarlaıdy akorda.kz.
Nursultan Nazarbaev D.Trampty prezıdent saılaýyndaǵy jeńisimen quttyqtap, oǵan saılaýaldy baǵdarlamasyn iske asyrý barysynda tabys tiledi.
AQSh-tyń saılanǵan prezıdenti Memleket basshysyn Qazaqstan Táýelsizdiginiń 25 jyldyǵymen quttyqtady. D.Tramp táýelsizdik jyldarynda respýblıkamyz Nursultan Nazarbaevtyń basshylyǵymen ǵajap jetistikterge qol jetkizgenin atap ótti.
Áńgime barysynda álemdegi jáne Ortalyq Azııa óńirindegi qaýipsizdik pen turaqtylyqty nyǵaıtý máseleleri jóninde pikir almasyldy.
Qazaqstan Prezıdenti elimizdiń ıadrolyq qarý-jaraqtan óz erkimen bas tartyp, ıadrolyq qarýsyz álem jolyndaǵy kúresti halyqaralyq qoǵamdastyqpen birlese jalǵastyratynyn aıtty.
D.Tramp bul ustanymmen tolyqtaı kelisetinin jetkizdi.
– Jahandyq deńgeıde sheshilýge tıis ıadrolyq qarýsyzdaný men ony taratpaýdan asqan mańyzdy másele joq, – dedi AQSh-tyń saılanǵan prezıdenti.
Budan bólek, Nursultan Nazarbaev D.Tramptyń nazaryn Reseı men Amerıka yntymaqtastyǵyn nyǵaıtýǵa múmkindik beretin basty úsh salaǵa aýdardy. Olar: terrorızmmen kúres, Ýkraınadaǵy daǵdarysty retteý jáne jahandyq ıadrolyq qaýipsizdikti nyǵaıtý.
Reseı prezıdenti V.Pýtınmen bolǵan telefon arqyly sóılesý qorytyndysyn eskerip, AQSh-tyń saılanǵan prezıdenti Vashıngton men Máskeý yntymaqtastyǵyn damytýdyń perspektıvasyna óziniń zor optımızmmen qaraıtynyn atap ótti.
Taraptar Qazaqstan men Amerıkanyń dostyq qarym-qatynasyn, sonyń ishinde saýda-ekonomıkalyq seriktestikti jańa deńgeıge kóterýge ázir ekenin málimdedi. D.Tramp jaqyn arada eki kóshbasshynyń kezdesýin ótkizýge múddelilik bildirdi.
Áńgimelesý sońynda AQSh-tyń saılanǵan prezıdenti barsha Qazaqstan halqyna respýblıka táýelsizdiginiń 25 jyldyǵy qarsańynda ıgi tilegin joldady.
