Jarqyn shejire

El tarıhynda tarıhı qujattardy saqtaýdyń orny erekshe ekeni belgili. Táýelsizdigimiz jarııalanǵannan bergi ýaqyttarda memleketimiz osy bir asa qundy dúnıelerdi tııanaqtaýǵa erekshe mán berip, Astanamyzda oǵan arnap zamanaýı ǵımarat turǵyzyp, qujattardy saqtaýdyń ozyq úlgidegi ádisterin qolǵa alǵan bolatyn. Endi, mine, Qazaqstannyń Tuńǵysh Prezıdenti kúni men el Táýelsizdiginiń 25 jyldyǵyna oraı elordadaǵy Ulttyq muraǵat mekemesi óz jádigerlerinen suryptalǵan qujattar negizinde «Elin súıgen, eli súıgen Elbasy» atty derekti kórme uıymdastyryp, qalyń kópshilikke tartý etti. Árisi 1976 jyldan bas­tap 2016 jyldar arasyn qamtyǵan qujattardy kórermenderge usynýdaǵy maqsat – arhıv is-qaǵazdary negizinde Elbasy, Tuńǵysh Prezıdentimiz Nursultan Nazarbaevtyń Qazaqstan Respýblıkasynyń qalyptasýy men damýyndaǵy rólin kórsete otyryp, qoltańbasyn aıshyqtaý men Respýblıka Táýelsizdiginiń 25 jyly ishinde oryn alǵan mańyzdy oqıǵalar men faktiler deńgeıin pash etý bolyp tabylady. Derekti kórmede negizinen Qazaq­stannyń táýelsizdik kezeńindegi qalyp­tasýy men damý tarıhyn baıandaı­tyn asa qundy arhıvtik qujattar, táýel­sizdik alǵan alǵashqy jyl­dardaǵy zań jobalary, 1993 jylǵy Qazaqstan Respýblıkasynyń Kon­stıtýsııasy, elimizdiń astanasyn belgileý, kó­shi­rý men atyn ózgertý, Qazaqstan Res­pýblıkasynyń Memle­kettik rámiz­derin aıshyqtaý, Táýelsiz Qazaq­stannyń syrtqy saıasaty men halyq­aralyq yntymaqtastyǵy jónin­degi táýelsizdigimizdiń 25 jyly ishindegi ne­gizgi qujattar qoıylypty. Bile bilsek, Qazaq eliniń eń ulaǵatty, eń taǵylymdy tarıhy – osy. Ulttyq tarıhtyń jarqyn betteri osylaısha paraqtalmaq. Kórme qalyń kórermenge elimiz tarıhynan syr sherter qundy dúnıelerdi usyna bilipti. Berik SADYR, «Egemen Qazaqstan» Sýretti túsirgen Orynbaı BALMURAT, «Egemen Qazaqstan»