Elbasy ne sebepti Parlamentti birneshe ret taratqanyn aıtty

«Sizder táýelsizdikpen qurdassyzdar. Sizder otanymyzdyń keńestik tarıhy, áke-sheshelerimiz ómir súrgen júıe, táýelsiz Qazaqstannyń alǵashqy qıyndyqtary týraly bilmeıtin alǵashqy býynsyzdar. Sizderge basqa ómir tanys emes. Alaıda, táýelsizdiktiń bizge ǵana emes, barlyq halyqtarǵa úlken qıyndyqpen keletinin bilýlerińiz qajet» dedi Nursultan Nazarbaev Astanada Respýblıkalyq jastar forýmynda sóılegen sózinde. «Elimizdiń uly da qıyn jolynda bári boldy: gıperınflıasııa, jappaı jumyssyzdyq, ónerkásip oryndarynyń jabylýy, jalaqy men zeınetaqynyń joqtyǵy. Bizge jumys isteý kerek boldy, Qazaqstannyń aıaǵynan turyp kete alatynyn dáleldeý kerek boldy. Túrli joramaldar aıtyldy. Kópultty el, ishki turaqsyzdyq, álsiz ekonomıkasy bolǵandyqtan Qazaqstan memleket bola almaıdy dedi. Biz bári kerisinshe ekenin dáleldedik. Turmys deńgeıi óte tómen, eshkim bilmeıtin el – 90-jyldardyń basyndaǵy jaǵdaı osyndaı bolatyn» dedi Memleket basshysy. Elbasy sonymen qatar Parlamentti nelikten birneshe ret taratýǵa týra kelgeni jóninde aıtty. «Eski júıe boıynsha saılanǵan Parlament jańa reformalardy jasaýǵa qarsylyq kórsetti. Sondyqtan jaýapkershilikti kóterýge týra keldi. Olardy dy kinálaýǵa bolmaıdy. Olar basqa formasııanyń adamdary edi. Jekeshelendirý, naryq, erkin ekonomıka, erkin saıasat sııaqty uǵymdar olarǵa túsiniksiz bolatyn, sondyqtan olardy qoldamady. Osylaısha, sol dúrbeleń jyldary bıliktegi qatań konfrontasııa jaǵdaıynda birneshe ret Parlamentti taratyp, jaýapkershilikti óz moınyma alýǵa týra keldi. Sóıtip, bes aıda zańdyq kúshi bar 147 jarlyq daıyndap, jarııaladyq. Dál osy sheshimder Qazaqstandy ózge postkeńestik eldermen salystyrǵanda áldeqaıda alǵa ozýǵa múmkindik berdi» dedi Nursultan Nazarbaev.