Birjan Jaqypov: Kásipqoı boksta baq synap kórgim keledi

  Rıo-de-Janeırodaǵy Olımpıadadan keıin Qazaqstan quramasyndaǵy ornyn bosatqan boksshy Birjan Jaqypov AIBA-nyń kásipqoı boks jobasyna qatysýǵa nıetti ekenin bildirdi. «ARV jobasy ári qaraı jalǵasyn taýyp jatsa, osy jobada áli de baq synap kórgim keledi» degen ol Qazaqparat agenttiginiń tilshisi Kúnsultan Otarbaıǵa bergen suhbatynda. Birjan Jaqypov 10 jyldan asa ýaqyt eń jeńil salmaqta bokstan ulttyq qurama sapynda iri jarystarǵa qatysyp, tolyp jatqan júldelerge ıe bolǵan sportshy, álem chempıony. Úsh ret Olımpıadaǵa qatysty, biraq úsheýinde de júldege iline almady. «Bas bapker Myrzaǵalı Qulanuly meni úsh Olımpıadaǵa apardy. Qazaq boksshylarynan eń kóp Olımpıada oıyndaryna barǵan men ekenmin. Alaıda, birde-bireýinde jolym bolmady. Tym quryǵanda úshtikke iline almadym. Armanym Olımpıadanyń bir júldesi edi. Oryndalmady. Qansha qýsań da, buıyrmaıtyn dúnıe buıyrmaıdy eken» dedi ol. «Qazir qaıda, ne istep júrsiz?» degen suraqqa Birjan Jaqypov «Qazir bospyn. Jumyssyz jatyrmyn. Naqty ne isteıtinimdi áli sheshken joqpyn. Qazir Shymkent qalasynda otbasymnyń qasyndamyn. Rıodan kelgennen beri demalyp jatyrmyn. Áli eshbir jattyǵý zaldarynyń esigin ashqan joqpyn. Olımpıada dep uzaq ýaqyt demalǵan joqpyz. Bir ýaqyt densaýlyqqa da kóńil bólmesek bolmaıdy ǵoı. Osy tórtjyldyq dodasy dep otbasymyzdyń bar ekenin de umytyp ketýge shaq qaldyq. Qashan bir jumystyń yńǵaıy kelgenshe úıde bolǵandy jón sanadym» dep jaýap berdi. Sonymen qatar dańqty boksshy aldaǵy josparlary týraly aıtty. "Eger APB jobasy ári qaraı jalǵasyn taýyp jatsa, osy jobada áli de baq synap kórgim keledi» dedi ol. Shaqyryp jatsa AIBA sheńberindegi kásipqoı boks jastaryna qatysýǵa nıetti ekenin jetkizdi. «Negizinen daıynmyn. Alla qalasa, jańa jyldan keıin, jattyǵý zaldarynyń esigin qaıta ashatyn bolamyn. О́z-ózime kelgenshe jattyǵýym kerek» dedi Jaqypov. Tilshiniń quramadaǵy eń jeńil salmaqtaǵy qazirgi boksshylar týraly suraǵyna baılanysty Birjan Jaqypov "Dál búgin Temirtas Júsipov pen Erjan Jomart ekeýiniń áleýeti teń dárejede. Aldaǵy ýaqytta qaısysy kóp eńbektenedi, qaısysy kóp jumys jasaıdy, sonyń bási joǵary bolady. Barlyq nátıje tek eńbekpen keledi» dep pikir bildirdi. Birjan ómirde endi oryndalmaıtyn armany jaıly bylaı degen: «Men de oryndalmaı ketken arman qaldy. Jalǵyz armanym Olımpıada júldesi bolatyn. Sol arman máńgi ustatpaı ketti. Endi, máńgi joq ol maǵan. Qansha jyl sol armandy qýaladym. Jete almadym. Jetkizbedi». Suhbat sońynda otbasy jaıly suraqqa álem chempıony «О́z otbasymda tórt aǵaıyndymyz. Bir aǵam, ózim jáne eki qaryndasym bar. Qazir eki balanyń - bir ul, bir qyzdyń ákesi boldym. Úıdegi uldyń kenjesi bolǵan soń, qara shańyraqqa ıe bolyp, áke-sheshemdi qolyma alyp otyrmyn. Aǵam da otbasyly, eki qaryndasym da turmysta. Ákem uzaq jyl bir kásiporynda esepshi bolyp qyzmet istep, zeınetke shyqty. Al, anam úzaq jyl mektepte oqytýshylyqpen aınalysyp keledi» dep jaýap bergen.