Taldyqorǵanda 40 páterdiń kilti tapsyryldy

Tuńǵysh Prezıdent kúni jáne Qazaqstan Respýblıkasy Táýelsizdiginiń 25 jyldyǵy qarsańynda Taldyqorǵan qalasynda 40 páterli kommýnaldyq úı paıdalanýǵa berildi. Birinshi kezekte páterlerge jetim balalar, múgedekter, kóp balaly analar, tolyq emes otbasylar, UOS múgedekteri men basqa da kezektegi azamattar ıe boldy. «Búgin kópshilikpen birge merekelik kóńil kúıde ózderińizge 40 páterli kommýnaldyq úıdiń kiltin tapsyrǵaly turmyz. Bul aıtýly oqıǵanyń Tuńǵysh Prezıdent kúni jáne el Táýelsizdiginiń 25 jyldyǵy qarsańynda ótip otyrǵany úlken qýanysh. Sizderdi kópten kútken jańa baspanaǵa ıe bolýlaryńyzben quttyqtaımyn! Otbasylaryńyzǵa bereke, molshylyq pen tabys tileımin. Merekelerińiz qutty bolsyn!» – dedi oblys ákimi Amandyq Batalov. Jalpy, Taldyqorǵan qalasynda 2012 jyldan beri jalpy alańy 87,8 myń sharshy metr bolatyn 23 turǵyn úı paıdalanýǵa berildi. Sonyń nátıjesinde 2 myńǵa jýyq otbasy baspanaly boldy. Osy jyldyń 9 aıynda oblys ortalyǵynda 4 úı paıdalanýǵa berildi. Jyl sońyna deıin taǵy 60 páterli kommýnaldyq úı iske qosylady dep josparlanǵan. Sonymen qatar, 9 úıdiń qurylysy júrip jatyr. Onyń 4-eýi – jeke ınvestısııa esebinen salynýda. Bul óz kezeginde taǵy 873 otbasynyń jańa páterli bolýyna múmkindik beredi.