Elordada uıymdastyrylǵan respýblıkalyq jastar forýmyna qatysyp, Elbasynyń aldynda sóz sóılegen belsendi azamattardyń biri - Arman Doshanbaev degen jas kásipker. Ol alǵashqy kásibin 17 jasynda bastapty.
«Men ol kezde Qaraǵandy qalasynda kompıýterlik tehnıka boıynsha jeke kásibimdi ashyp, sony dóńgelettim. Aıyna 300 myń teńgege jýyq qarjy tabatynmyn. Ol mektep oqýshysy úshin úlken tabys edi. Qazir jasym 25-te. Meniń 4 kompanııam bar. Onyń bireýiniń ózinen jylyna 168 mıllıon teńge qarajat túsedi. 33 jumys ornymen qamtamasyz etedi», - dedi ol.
Sonymen qatar, Armannyń «Otan» brendimen saǵat jasaıtyn kásiporny bar eken.
«Bul kásipornym «Qazaqstanda jasalǵan» jobasyn iske asyrýǵa úles qosýda. Sizdiń tapsyrmańyzben júzege asyrylyp jatqan «Bıznes 2020» Baǵdarlamasynyń arqasynda bizdiń kásiporyn úlken serpilis aldy. Osy úshin sizge zor alǵys aıta otyryp, ózińizge arnap jasaǵan qolsaǵatty syıǵa tartýǵa ruqsat etińiz»,- dedi Arman Doshanbaev.
Al Prezıdent jas kásipkerdiń syılyǵyn erekshe yqylaspen qabyl ala otyryp, «Jaraısyń! Endi biz shveısarlyq emes, ózimizdiń saǵatymyzdy taǵatyn bolamyz», dep óz rızashylyǵyn bildirdi.
Láıla EDILQYZY,
«Egemen Qazaqstan»
Sýretterdi túsirgen: Erlan OMAROV
