«Moana» qazaqsha sóıledi

«Bolashaq» korporatıvtik  qory qoldaýymen qazaqsha til qatqan «Ýolt Dısneı» stýdııasynyń «Moana» anımasııalyq fılminiń kórsetilimi ótti. «Ýolt Dısneı» stýdııasynyń úzdik 56 anı­masııalyq óniminiń tizimine enetin «Moana» kıno­kartınasynyń ereksheligi – dýblıajda qazaq­standyq tanymal ártister men QazUО́Ý-niń stý­dentteriniń  qatysýymen 11 án oryndalady. Moananyń daýysyn dybystaǵan teatrdyń talantty aktrısasy Nazerke Serikbolova tanys­tyrylym sátinde bergen suhbatynda: «Maǵan bul joba óte unady. О́ıtkeni, kartınanyń basty keıipkerin dybystadym, ánderin oryndadym, mundaı tamasha áserge qýanbaý múmkin emes. Árıne, jáı kórgen adamǵa onyń qıyndyqtary, jaýapkershiligi aıtarlyqtaı aýyr bolmaǵanmen, men úshin Týı kósemniń qyzy, 14 jasar armanshyl Moananyń daýysyn balǵyndardyń júregine juǵymdy etip jetkize alý op-ońaı kelgen jeńil olja dep aıta almaımyn. Daýys arqyly óz keıipkerińniń  barlyq emosııalaryn qaltqysyz qaıtalaý, bárin seziný, qýaný, muńaıý oryndaýshydan úlken sheberlikti talap etedi. Bir kadrda ol ekpindep kelip, jartastan sýǵa sekirip, qaıta aıqalaıdy. Sonda maǵan da osy oqıǵaǵa jalma-jan ilesip, sondaǵy daýy­s pen yrǵaqty ol sýǵa sekirgenshe ustap turý kerek boldy.  Muny men dál solaı istedim... Tipti, kadr ústinde ishki jan túısigimizge deıin onymen sonshalyq jaqyn, uqsas ekenin uqtym. Men oǵan az ýaqytta baýyr basyp, jaqsy kórip kettim», dep aǵynan jaryldy.  Qazaq tilindegi dýblıajdyń rejısseri Rıta Ábisheva men jobanyń mýzykalyq basqarýshysy Kúnimgúl Boranbaeva «Dısneı» ónimderi qazaqstandyq búldirshinderdiń óz ana tilderinde sóılep, oqyp-úırenýlerine kóp septigin tıgizetinin tilge tıek ete kelip, qazaq tili «Soni Pictures» stýdııasynyń ónimderin dýblıajdaýshy – 7-shi,  al «Walt Disney» stýdııasy boıynsha 39-shy tildiń qataryna enip otyrǵanyn málimdedi. Jalpy, otandyq joba júzege asyrylǵaly beri gollıvýdtyq 16 kınokartına qazaq tilinde dybystalǵan eken. Anımasııalyq fılmniń  dýblıajyna bas-aıaǵy 35-ten astam akter qatysqan. Atap aıtar bolsaq, Moananyń ájesi Talany – Lıdııa Káden, Moananyń anasy Sınany – Maqpal Isabekova, jartylaı qudaı keıpindegi Maýıdi – ánshi Búrkit, Týı kósemdi – Jánibek Musaev, Tamatoany Syrym Qashqabaev dybystaıdy. Sonymen qatar, shyǵarmashylyq toptyń quramynda munan da basqa elimizdiń tanymal akterleri men estrada oryndaýshylary bar. Alǵashqy kórsetilim qalyptasqan dástúr boıynsha Astana men Almaty, sondaı-aq, Shymkent qalalarynyń kınoteatrlarynda saltanatty jaǵdaıda ótti. Buǵan jobanyń ıdeıalyq qoldaý­shysy, «Bolashaq» qaýymdastyǵy keńe­siniń qurmetti múshesi, Almaty qalasynyń ákimi B.Baıbek, Shymkent qalasynyń ákimi Ǵ.Ábdirahymov, dýblıajdyń akterleri, mádenıet pen óner qaıratkerleri, balalar úıiniń tárbıelenýshileri, jastar uıymdarynyń belsendileri, t.b. qatysty. Joba sheteldik kınonyń qazaq tilindegi qoryn jınaqtaýda aıtarlyqtaı tabystarǵa qol jetkizgen. Fılmderdi dýblıajdaý jáne prokattaý, taspalardy iske asyrý boıynsha Gollıvýdtyń «Disney», «Naývel», «Metro-Goldwyn-Mamer» stýdııalarymen aldyn ala quqyqtyq kelisimder júrgizilgen. Sondaı-aq, bul bastama Elbasy tarapynan joǵary baǵalanyp, «Máńgilik El» jalpyulttyq ıdeıasyna qosylǵan úlken úles jáne keń aýqymdy qoǵamdyq, medıa qoldaý bolyp esepteledi. Sol sebepti de Qordyń kóshbasshy stýdııalarmen mundaı ózara shyǵarmashylyq yntymaqtastyǵy qazaq tilin damytý men halyqaralyq deńgeıde nasıhattaýdyń múmkindigi retinde baǵalanady. Al kórsetilim aıasynda «Moana» fılminiń saryny boıynsha qazaqsha eń jaqsy shyǵarma men kórkemdik ıllıýstrasııaǵa oqýshylar arasynda baıqaýdyń jarııalanýyn osy ıdeıanyń júzege asyryla bastaýynyń jarqyn mysalyna jatqyzýǵa bolady. Qarashash TOQSANBAI, «Egemen Qazaqstan»