Iri qalalar dızelmen júretin kólikterge tyıym salmaq

Parıj, Mehıko, Madrıd pen Afına qalalary 2025 jylǵa qaraı dızelmen júretin kólikterge tyıym salý týraly sheshim qabyldady. Bul týraly Meksıkada ótken C40 qala basshylarynyń kezdesýinde belgili boldy, dep habarlady BBC. Atalǵan tórt qalanyń basshylary kelesi onjyldyqta dızelmen júretin barlyq jeńil jáne júk kólikterine tyıym salmaq. Olardyń aıtýynsha, bul sheshim aýanyń tazalyǵyn saqtap qana qoımaı, elektr, sýtegi jáne gıbrıdti kólikter sanyn arttyrýǵa da septigin tıgizedi. Sonymen qatar jaıaý júrginshiler men velosıpedpen qatynaýshylardyń sanyn da birshama kóbeıtedi. Parıj meri Enn Idalgo "Biz Tokıonyń úlgisimen qalamyzdyń aýasyn lastaıtyn avtokólikterge tyıym salmaqpyz", dese, Madrıd qalasynyń basshysy Manýela Karmena "Aýanyń tazalyǵy klımattyń ózgerýine qarsy kúresimizge baılanysty. Eger aýamyz taza bolsa, balalarymyzdyń da deni saý bolady", - dedi. Bul jaǵdaı avtokólik shyǵarýshylardyń josparyna da áser etýi múmkin. Sebebi, kólik ónerkásibi basqa da iri qalalardyń osyndaı sheshim qabyldaýy múmkin ekenin eskerip, soǵan qaraı beıimdeletin bolady. Dúnıejúzilik densaýlyq saqtaý uıymy atmosferanyń lastanýynan jyl saıyn 3 mln adamnyń  óletini aıtady. Osyǵan oraı dızeldiń atmosferaǵa tıgizetin zııany sońǵy jyldary jıi talqylanyp júrgen máselelerdiń biri.