Stıven Hokıng
Brıtan teoretık-fızıgi Stıven Hokıng «Jer planetasy úshin eń qaýipti ýaqyt» týdy degen joramal boljam jasady. Bul týraly ol The Guardian basylymyndaǵy baǵanasynda jazady. Ǵalym elıtalar men qarapaıym adamdar arasyndaǵy alshaqtyqtyń ulǵaıyp bara jatqanyna nazar aýdarady. Hokıngtiń aıtýyna qaraǵanda, kásiporyndarda jumysty robottarǵa berý, adam resýrstaryn paıdalanyp joǵary kólemde tabys tabý qajettiginiń azaıýy qoǵamdaǵy ár túrli toptaǵy adamdardyń arasynda qarym-qatynastyń nasharlaýyna alyp keledi. «Ǵalamtor jáne platformalar ekonomıkalyq teńsizdiktiń artýyn tezdetip jatyr. Onyń arqasynda az ǵana adam qyzmetke az ǵana adamdy jaldaý arqyly shash-etekten tabys taýyp jatyr. Buǵan qarsy tura almaımyz, bul progress. Degenmen áleýmettik turǵydan bul óte qaýipti», – dep jazady ǵalym. Onyń pikirinshe, keıbir adamdardyń qoǵamdaǵy ózgeristerdi qabyldaı almaýy nege aparyp soǵatynyn AQSh-ta prezıdent saılaýy men Ulybrıtanııadaǵy Eýropa odaǵynan shyǵý jóninde daýys berý qorytyndysy kórsetti. Stıven Hokıng atalǵan problemalardy sheshý úshin barlyq elder, qoǵamnyń barlyq toptary birlese kúsh salýy kerektigin aıtady. «Bálkim, birneshe ǵasyrdan keıin biz basqa juldyzdardyń aınalasyndaǵy ǵalamsharlarda ómir súretin shyǵarmyz. Biraq qazir bizde bir ǵana ǵalamshar bar. Ony qorǵaý úshin biz birlese jumys isteýimiz kerek. Ol úshin memleketter arasyndaǵy kedergilerdi kóbeıtý ornyna, qurtýymyz qajet» – deıdi ol Stıven Hokıng.
