Soltústik Qazaqstanda maı óńdeıtin zaýyt iske qosylady

Soltústik Qazaqstan oblysynyń ákimi Erik Sultanov Taıynsha aýdanyna jumys sapary barysynda Ilıchevka selosyna bardy, sondaı-aq, Amandyq selolyq okrýginiń turǵyndarymen kezdesti, dep habarlaıdy oblys ákimdiginiń baspasóz qyzmeti. Jınalǵandardy Táýelsizdiktiń 25 jyldyǵymen quttyqtaǵan óńir basshysy egemendiktiń alǵashqy jyldarynda ekonomıkalyq jáne áleýmettik daǵdarysty boldyrmaý úshin mańyzdy sheshimder qabyldanǵanyn atap ótti. «Táýelsizdik jyldarynda áleýmettik sala boıynsha oblystyń eldi mekenderinde kóptegen máseleler sheshimin taýyp, aýqymdy ister júzege asyryldy. Jıyrma bes jylda aýdan tarıhy mańyzdy oqıǵalarǵa, jańa jobalarǵa tolyǵyp, jeńisti joldan ótti. Aýyl jurtshylyǵynyń táýelsiz jas memleketimizdiń búgingideı bıik deńgeıge kóterilip, Elbasy júktegen mereıli mindetterdi abyroımen iske asyrýǵa qosyp kele jatqan úlesteri zor», - dedi Erik Sultanov. Oblys ákimi «Taıynsha-Maı» JShS jańa kásiporynynyń damý bolashaǵy týraly aıtyp ótti. Qytaı ınvestorlarymen birlesken joba Ilıchevka selosynda júzege asyrylýda. Maıly daqyldardy óńdeý zaýyty jaqyn arada júzege aspaq. Zaýyt jylyna 300 tonna shıkizat óńdeıtin bolady. Budan bólek, munda eksportqa beıimdelgen ónim shyǵarylmaq. Atalǵan óndiris iske qosylǵan soń, jergilikti halyq jumyspen qamtylady. Oblystyń áleýmettik-ekonomıkalyq damýyna qosqan eleýli úlesi jáne qoǵamdyq ómirge belsendi aralasqany úshin jáne Qazaqstan Respýblıkasy Táýelsizdiginiń 25 jyldyǵyn merekeleýge baılanysty oblys ákiminiń Qurmet gramotasymen Aımaq negizgi mektebiniń dırektory Saqysh Álıeva marapattalsa, taǵy eki aýyl turǵynyna Alǵys hattar tabystaldy.   Búgingi tańda Amandyq selolyq okrýginiń 4 pýnktinde 1600-den astam adam turady. Kezdesý barysynda turǵyndar óńir basshysyna óz saýaldaryn qoıyp, usynystaryn bildire aldy.