Túrkııa shet eldermen óz valıýtalarymen saýda jasamaqshy

Ankara Reseımen, Qytaımen jáne Iranmen tek ózderiniń ulttyq valıýtasynda saýda jasaýǵa kóshti, dep habarlaıdy Haberler basylymy el prezıdenti Erdoǵanǵa silteme jasap. Erdoǵannyń aıtýynsha, Túrkııa úkimetiniń basshysy Bınaly Iyldyrym bul máseleni 5 jeltoqsan kúni jasaıtyn Máskeý saparynda reseılik áriptesterimen talqylamaq. «Osylaısha biz syrtqy saýdany ulttyq valıýtamen jasaýǵa ótemiz. Reseıden alatyn taýardy tek rýblmen tólep, óz kezeginde Reseı bizdiń taýarlardyń aqysyn túrik lırasymen óteıdi», - dedi Erdoǵan. Prezıdenttiń sózine súıensek, Túrkııanyń Ortalyq bankine osyndaı buıryq qazirden berilip qoıǵan. Erterekte Erdoǵan ózge memleketterdiń Túrkııaǵa valıýta naryǵy arqyly ekonomıkalyq qysym kórsetkisi keletinin málimdegen edi. «О́kinishke oraı, bizdiń kásipkerler soǵan aldanyp qalyp jatady», - degen edi memleket basshysy. Sonymen qatar Erdoǵan eldi tek ulttyq valıýtamen qarjy jınaýǵa shaqyrdy.