Jekemenshik balabaqsha tárbıeshilerin memlekettik bıýdjetten oqytý qarastyrylýda

Qazaqstanda 2017-2019 jyldarda 154,5 myń orynǵa 1 630 mektepke deıingi mekemeni ashý josparlanýda, onyń ishinde 154,5 myń orynǵa shaqtalǵan 970 jekemenshik uıym ashylmaq. Bul týraly Úkimet otyrysy kezinde QR bilim jáne ǵylym mınıstri Erlan Saǵadıev baıandady. E.Saǵadıevtiń aıtýynsha, qazirgi kezde 9 407 mektepke deıingi mekeme jumys isteıdi, olardyń ishinde jekemenshiktiń úlesine 2 413 nemese tórtten bir bóligi tıesili. 2016 jyly mektepke deıingi uıymdar jelisi 811 birlikke arttyryldy, onyń ishinde MJÁ tetikterin qoldaný esebinen 1,3 myń orynǵa shaqtalǵan 7 balabaqsha ashyldy. Jekemenshik mektepke deıingi mekemeler sany 10 esege artyp, 100 mlrd. teńgeden astam jeke ınvestısııa mektepke deıingi tárbıe men bilim júıesin damytýǵa jumsaldy. Qazirgi kezde konsessııalyq jobalardy basqarý úshin 14 MJÁ aımaqtyq ortalyqtary quryldy. QR BǴM aqparatyna sáıkes, memlekettik tapsyrysty balalardyń naqty bolýymen baılanystyrmaý boıynsha mektepke deıingi mekemelerge memlekettik tapsyrys berý Erejelerine ózgerister engizildi. Bul atalǵan mekemelerge ǵımaratty ustaý, personal eńbekaqysy boıynsha shyǵyndardy tóleýge múmkindik beredi. Zańnamalyq negizde jeńildikter usyný máselesi retteldi. - Atap aıtqanda, korporatıvtik salyq alynbaıdy, jer salyǵynyń mólsherlemesi 10 esege tómendetildi, múlikke salynatyn salyq salyqtyq bazaǵa 0,1% mólsherlemesinde esepteledi. Jekemenshik balabaqshalardyń tárbıeshilerin memlekettik bıýdjet esebinen oqytý máselesi pysyqtalýda. Jalpy, «Konsessııalar týraly» jáne «Memlekettik-jekeshelik áriptestik týraly» QR Zańdary aıasynda jergilikti atqarýshy organdar bilim berý salasynda jalpy somasy 65,3 mlrd. teńgege balabaqshalar, mektepter men kolledjder qurylysyna qatysty MJÁ 99 jobasy boıynsha jumystar júrgizýde, dep atap ótti E.Saǵadıev. Arnur ASQAR, "Egemen Qazaqstan".