Lıtvalyq IT-kompanııalar Qazaqstannan seriktes izdeıdi

Baltyq jaǵalaýy eliniń jańa tehnologııalar salasy álemde úzdik dep tanylǵan, dep habarlaıdy palata.kz. Almaty qalasy Kásipkerler palatasy, Lıtva Respýblıkasynyń Almaty qalasyndaǵy Bas konsýldyǵy, «INFOBALT» jáne Lıtvanyń  IT-kompanııalar qaýymdastyǵy eki eldiń jetekshi kompanııalarynyń qatysýymen Qazaqstan-Lıtva IT-forýmyn uıymdastyrdy. Forým qatysýshylarǵa ortaq bıznesti damytýǵa, paıdaly iskerlik qatynastar ornatýǵa múmkindik berdi. «Qazaqstan Lıtvanyń Ortalyq Azııadaǵy basty ekonomıkalyq seriktesteriniń biri bolyp tabylady. Oǵan dálel, sońǵy jeti jylda eki el arasyndaǵy taýar aınalymy artty. Ásirese, jańa tehnologııalar salasyndaǵy yntymaqtastyq qarqyndy damyp keledi. Qazaqstanda birlesken 100 kásiporyn jumys jasaýda jáne bul Baltyq jaǵalaýy elderi arasyndaǵy joǵary kórsetkish», – dep habarlady Almaty qalasy Kásipkerler palatasynyń sarapshysy Aqerkin Eralıeva. Osylaısha, Qazaqstannyń bıznes ókilderine Lıtvanyń aldyńǵy qatarly kompanııalary óz IT-jobalaryn tanystyrdy. 30 jyldyq tarıhy bar «Merakas» kompanııasy qoǵamdyq kólik qozǵalysyn jandandyrý jáne josparlaý boıynsha aıryqsha jobany nazarǵa usyndy. «Erekshe júıeni engizý kólik keptelisiniń aldyn alyp, avtobýstardyń, trolleıbýstar men metro kóliginiń aıaldamaǵa bir ýaqytta keptelýine jol bermeıdi. Bul maqsatta biz qalanyń sıfrlyq kartasyn paıdalanamyz. Bizde jolaýshylar legin qamtıtyn, qoǵamdyq kólikterdiń kestesin qurastyratyn teńdessiz algorıtm bar. Kompıýterlik baǵdarlamalar baǵdarlarǵa qandaı ýaqyt aralyǵynda jáne qaı ýaqytta júrý kerektigin eseptep beredi.  Bul rette, kóliktiń isten shyǵýy, júrgizýshilerdiń túski asy jáne olardyń kezek aýystyrýy syndy jaıttar da eskeriledi. Bizdiń qosymshany qazir Estonııa úkimeti satyp aldy. Sonymen qatar, biz Reseı, Ispanııa, Latvııamen tabysty jumys jasap kelemiz. Qazir jobany Brazılııa jáne QHR-ǵa engizý týraly kelissózder júrgizilip jatyr. Erteń jobany Almaty qalasy ákimdigimen birge talqylaıtyn bolamyz», – dedi dırektor Romas Mıskýs. Jalpy, bir jarym mıllıon halqy bar Estonııa atalǵan júıege kóshý úshin 800 myń evro jumsapty. Eger jergilikti basqarma atalǵan jobaǵa qyzýǵyshylyq tanytsa, Almaty qalasyna bul júıege ótý úshin dál osyndaı qarajat qajet bolmaq. Forým sońy qos el bıznesmenderiniń B2B sessııasymen aıaqtaldy. Lıtva Respýblıkasy Bas konsýldyǵynyń málimetine súıensek, 2015 jyly Lıtva men Qazaqstan arasyndaǵy taýar aınalymy 683 mln eýrony quraǵan. Olardyń ishinde 387 mln eýro eksport, 296 mln eýro ımport eken. Lıtvanyń 187 saýda-sattyq jónindegi seriktesteri arasynda Qazaqstan  taýar aınalymy jáne ımport boıynsha (2015 jyl) 20-orynda, al eksport boıynsha 16-orynda tur (2015 jyl). Lıtva ekonomıkasyna jumsalǵan qazaqstandyq ınvestısııa kólemi ótken jyly 3,53 mln eýrony quraǵan. Bul kórsetkish 2014 jylmen salystyrǵanda eki ese kóp.