Álıhan Aqberdi – qazaq kúresinen «Taıqazan» júldesiniń jeńimpazy

Taraz memlekettik pedagogıkalyq ınstıtýtynyń 2-kýrs stýdenti Álıhan Aqberdi qazaq kúresinen jastar arasynda «Taıqazan» júldesi úshin ótken jarysta altyn medalǵa ıe boldy. Bul týraly TarMPI-dyń aqparattyq-ımıdjdik qyzmeti habarlady. El Táýelsizdiginiń 25 jyldyǵyna oraı uıymdastyrylǵan jarysqa elimizdiń barlyq óńirinen 156 balýan qatysty. Jalpykomandalyq esepte Jambyl oblysynyń sporshylaryna teń keler eshkim tabylmady. 100 keli salmaq dárejesinde beldesken Álıhan Aqberdi jarys jolynda Almaty qalasy men Jambyl oblysynyń balýandarymen kúsh synasty. Fınalda ol jerlesi N. Jumahannan basym tústi. «Álıhan ulttyq sport túrimen tórt jyldan beri aınalysady. Búginde qazaq kúresinen sport sheberligine úmitker. Ol buǵan deıin birneshe dodalarda jeńimpaz atanǵan. Aldaǵy ýaqytta da talaı qarsylasyn shań qaptyratynyna senimdimin», – dedi jattyqtyrýshysy Maqsat Iztileýov. Aıta keteıik, Álıhan buǵan deıin qazaq kúresinen respýblıkalyq «Jas barys» týrnırinde 2-oryn, Ǵ. Saparǵalıevti eske alýǵa arnalǵan qazaq kúresinen respýblıkalyq týrnırde 3-oryn jáne respýblıkalyq «Aıbyn» áskerı patrıottyq jastar jıynynda kúmis medaldy jeńip alǵan. Jasóspirimder arasyndaǵy halyqaralyq dárejedegi sport sheberi.